Тожикистонда 13 март куни ҳаво ҳарорати кескин совишни бошлайди. Бу ҳақда республика Гидрометеорология агентлиги хабар берди.
Синоптикларга кўра, ёғингарчилик кузатилиб, ёмғир баъзи туманларда қорга айланади. Водий-тоғ олди ҳудудларида ҳаво ҳарорати кундузи 10-12 даражага тушиши кутилмоқда. 13 март куни Душанбеда ҳаво булутли бўлади, ёмғир аралаш қор ёғади, кечга келиб ёғингарчилик кучаяди. Ҳозирда Душанбеда кундузи 18 даражагача илиқ бўлса, эртага ҳаво ҳарорати кундузи атиги 5-7 даража, кечаси 3-5 даража илиқ бўлади. 14 мартга келиб ҳарорат яна исиши кутилмоқда.
Шунингдек, яқин ҳудудларда ёмғир ва қор ёғади, жойларда туман тушиши мумкин. Ҳаво ҳарорати водийларда кечаси ва кундузи 2-7 даража илиқ, тоғли ҳудудларда 1-6 даража совуқ бўлади. Мамлакат шимолида баъзи жойларда ёмғир ва қор ёғиши кутилмоқда. У ерда ҳаво ҳарорати кундузи 7-9 даража илиқ, тоғли ҳудудларда 2 даража совуқ, 3 даража илиқ бўлади.
Мамлакатнинг энг иссиқ ҳудуди — Хатлон вилоятида ҳам ҳаво ҳарорати пасаяди. Агар бугун 19-21 даража иссиқ бўлса, эртага 8-10 даража илиқ бўлади. У ерда ҳам ёғингарчилик кузатилади. Тоғли Бадахшон автоном вилоятида ҳаво бир оз булутли бўлиб, ёмғир ва қор ёғиши кутилмоқда. Эртага кундузи Хоруғда ҳаво фақат 2 даражагача исийди.
Аввалроқ Қозоғистон ва Қирғизистонда ҳам ҳарорат мос равишда -20 ва -21 даражага тушиб кетиши маълум қилинганди. Шунингдек, Ўзбекистонга ҳам совуқ ҳаво массалари кириб келиши, ёмғир қорга айланиши кутилмоқда.
Изоҳ (0)