Исроилнинг Дайр ал-Балоҳда ёрдам тарқатувчи юк машинасига берган зарбаси оқибатида камида тўққиз киши ҳалок бўлди, кўплаб одамлар яраланди. Бу ҳақда Al Jazeera хабар берди.
Ҳодисага гувоҳ бўлганлардан бири ҳудуд ракеталар билан ўққа тутилгани, шрапнеллар учиб кетгани, ҳалок бўлганларнинг тана аъзолари ҳавода учганини айтмоқда.
Юк машиналари гуманитар ёрдам олиб кетаётган эди ва унда кўнгилли фуқаролар ҳам бўлган. Улар бомбардимонлар сабабли кўчирилган Ғазо аҳолисига озиқ-овқат олиб келишаётган эди, Дайр ал-Балоҳ хавфсиз ҳудуд ҳисобланганди, — дейди у.
Исроил ҳарбийларидан ҳозирча ҳеч қандай изоҳ берилмаган. Сўнгги бир неча кун ичида Ғазо шаҳридаги Камол Адван касалхонасида камида 15 бола тўйиб овқатланмаслик ва сувсизланишдан вафот этган.
Агар уруш тугамаса ва гуманитар ёрдам йўлидаги тўсиқлар зудлик билан ҳал этилмаса, ҳалок бўлганлар сони тезликда ортиши мумкин, — дейди UNICEF’нинг минтақавий директори Аделе Ходр.
- 29 февраль: Исроил аскарлари Ғазо жануби-ғарбида озиқ-овқат ёрдамини кутаётган одамларга қарата ўт очиши оқибатида камида 112 фаластинлик ҳалок бўлди ва юзлаб одамлар яраланди. Исроил армияси одатдагидай фаластинликлар тиқилинч сабабли ўлганини даъво қилди.
- 26 февраль: Исроил кучлари Ғазо шаҳрида озиқ-овқат олиб келаётган юк машиналарини кутаётган оломонни ўққа тутиши оқибатида ўн киши ҳалок бўлди.
АҚШ вице-президенти Камала Ҳаррис Ғазо секторида “зудлик билан ўт очишни тўхтатиш”га чақирди
Ғазо секторидаги улкан азоб-уқубатларни инобатга олган ҳолда, ҳеч бўлмаганда кейинги олти ҳафта давомида зудлик билан ўт очишни тўхтатиш керак ва ҳозирда бу кўриб чиқилмоқда, — деди Ҳаррис.
У “зудлик билан ўт очишни тўхтатиш”га чақиришдан ташқари, Исроилни Ғазо секторидаги “гуманитар фалокат”ни юмшатиш учун етарли ҳаракат қилмаётганликда айблади. Фаластин расмийларига кўра, 7 октябрдан бери Исроилнинг Ғазога қарши урушида 30 400 дан ортиқ одам, асосан, аёллар ва болалар ҳалок бўлди.
Изоҳ (0)