Ўзбекистондаги энг йирик “Газли” ерости газ омборига эгалик қилувчи Gazli Gas Storage қўшма корхонаси таъсисчиси ўзгаргани ҳақида хабарлар тарқалди. Gazli Gas Storage компаниянинг мавҳум иштирокчилари ҳақидаги ОАВда тарқалган хабарларни асоссиз деб атаб, баёнот билан чиқди.
Унда айтилишича, 2023 йил октябрь ойида корпоратив реструктуризация натижасида ташкилотнинг илгари Россиянинг Форус АЖга тегишли бўлган улуши Гонконгда рўйхатдан ўтган Daxоn Holdings Limited компаниясига ўтди.
“Бахтиёр Фозилов реструктуризациядан олдин ҳам, кейин ҳам асосий бенефисиар сифатида қолмоқда. Gazli Gas Storage МЧЖ санкциялар остида бўлган шахсларга ҳеч қачон тегишли бўлмаган”, — дейилади баёнотда.
Қайд этилишича, Гонконгга релокация бўлиш тўғрисидаги қарор Хитой компаниялари билан катта ҳажмдаги бизнес алоқалари ўрнатилгани туфайли қабул қилинди. Гонконгда қонуний рўйхатдан ўтиш ҳисоб-китобларни ва қўшимча молиялаштиришни жалб қилишни, бизнесни янада ривожлантириш учун ускуналар сотиб олишни осонлаштиради.
Бундан ташқари, қайта ташкил этиш бошқарув шаклини соддалаштиради ва уни халқаро инвесторлар ва контрагентлар учун янада шаффоф ва мақбул қилади.
Баёнотда айтилишича, Gazli Gas Storage МЧЖ Ўзбекистондаги газ омборининг оператори ҳисобланади. Уни кенгайтириш дастури мамлакатнинг энергия хавфсизлигини сезиларли даражада оширади. Gazli Gas Storage фаолияти газни сақлаш ҳажмини 3 миллиарддан 10 миллиард метр кубгача, яъни уч баравар оширишга қаратилган.
Хорижий инвесторларнинг 310 миллион доллар миқдоридаги сармоялари ўз натижасини берди: газ омборининг қуввати 50 фоизга ошиб, 4,5 миллиард метр кубга етди. Биринчи уч йилда нефть қазиб олиш асосий режадан 25-30 фоизга ошди, натижада 47 минг тонна нефть қазиб олинди ва газ қазиб олиш 550 миллион метр кубга етди. Бу эса Ўзбекистон ички бозорининг ривожланишига ёрдам беради. Лойиҳа иш билан таъминлаш имкониятларини ҳам кенгайтирди: бугунги кунга қадар 200 дан ортиқ янги иш ўринлари яратилди ва яна 100 та иш ўрни яратиш режалаштирилган.
Изоҳ (0)