O‘zbekistondagi eng yirik “Gazli” yerosti gaz omboriga egalik qiluvchi Gazli Gas Storage qo‘shma korxonasi ta’sischisi o‘zgargani haqida xabarlar tarqaldi. Gazli Gas Storage kompaniyaning mavhum ishtirokchilari haqidagi OAVda tarqalgan xabarlarni asossiz deb atab, bayonot bilan chiqdi.
Unda aytilishicha, 2023-yil oktyabr oyida korporativ restrukturizatsiya natijasida tashkilotning ilgari Rossiyaning Forus AJ ga tegishli bo‘lgan ulushi Gonkongda ro‘yxatdan o‘tgan Daxon Holdings Limited kompaniyasiga o‘tdi.
“Baxtiyor Fozilov restrukturizatsiyadan oldin ham, keyin ham asosiy benefisiar sifatida qolmoqda. Gazli Gas Storage MCHJ sanksiyalar ostida bo‘lgan shaxslarga hech qachon tegishli bo‘lmagan”, — deyiladi bayonotda.
Qayd etilishicha, Gonkongga relokatsiya bo‘lish to‘g‘risidagi qaror Xitoy kompaniyalari bilan katta hajmdagi biznes aloqalari o‘rnatilgani tufayli qabul qilindi. Gonkongda qonuniy ro‘yxatdan o‘tish hisob-kitoblarni va qo‘shimcha moliyalashtirishni jalb qilishni, biznesni yanada rivojlantirish uchun uskunalar sotib olishni osonlashtiradi.
Bundan tashqari, qayta tashkil etish boshqaruv shaklini soddalashtiradi va uni xalqaro investorlar va kontragentlar uchun yanada shaffof va maqbul qiladi.
Bayonotda aytilishicha, Gazli Gas Storage MCHJ O‘zbekistondagi gaz omborining operatori hisoblanadi. Uni kengaytirish dasturi mamlakatning energiya xavfsizligini sezilarli darajada oshiradi. Gazli Gas Storage faoliyati gazni saqlash hajmini 3 milliarddan 10 milliard metr kubgacha, ya’ni uch baravar oshirishga qaratilgan.
Xorijiy investorlarning 310 million dollar miqdoridagi sarmoyalari o‘z natijasini berdi: gaz omborining quvvati 50 foizga oshib, 4,5 milliard metr kubga yetdi. Birinchi uch yilda neft qazib olish asosiy rejadan 25-30 foizga oshdi, natijada 47 ming tonna neft qazib olindi va gaz qazib olish 550 million metr kubga yetdi. Bu esa O‘zbekiston ichki bozorining rivojlanishiga yordam beradi. Loyiha ish bilan ta’minlash imkoniyatlarini ham kengaytirdi: bugungi kunga qadar 200 dan ortiq yangi ish o‘rinlari yaratildi va yana 100 ta ish o‘rni yaratish rejalashtirilgan.
Izoh (0)