Тошкент шаҳар ИИББ Йўл ҳаракати хавфсизлиги бошқармасининг Рўйхатга олиш — Диагностика маркази иш бошлади. ИИВ Йўл ҳаракати хавфсизлиги хизмати томонидан марказга журналистлар учун пресс тур уюштирди.
Таъкидланишича, марказ фаолиятини ташкил этишда Германия, Бельгия, Франция каби ривожланган давлатлар шаҳарларининг экологик муҳитини муҳофаза қилиш соҳасидаги илғор тажриба инобатга олинган.
Бу ерда транспорт воситаларига давлат рақам белгиси бириктириш ва қайд этиш гувоҳномасини топшириш жараёни турли бюрократик тўсиқлар ва оворагарчиликдан холи қилинган, инсон омили минимал даражага туширилган. Аввал автомототранспорт воситасини рўйхатдан ўтказиш жараёни олти-етти босқичда амалга оширилган бўлса, ҳозирда босқичлар сони учтага қисқарган.
I-босқич
Транспорт воситаларининг қарздорлиги ва тақиқини автоматик текшириш ва бартараф этиш. (А блок) Давлат хизматларидан фойдаланиш учун келган транспорт воситалари объектга кириш қисмида ташкил этилган йўлаклар бўйлаб ҳаракатланади.
Бунда юк автомобиллари ҳамда давлат хизматларидан фойдаланиш учун онлайн рўйхатдан ўтган транспорт воситалари алоҳида йўлакларга йўналтирилади.
Ҳар бир йўлакка ўрнатилган стационар камера ёрдамида автомобилнинг давлат рақам белгиси қайд этилади ва Йўл ҳаракати хавфсизлигининг “Ягона автоматлаштирилган ахборот тизим”дан текширувдан ўтказилади.
- Қарздорлиги ёки тақиқ мавжуд транспорт воситалари алоҳида йўлак орқали маъмурий бинога йўналтирилади.
- Қарздорлиги ёки тақиқ мавжуд бўлмаган транспорт воситаларига электрон навбат бириктирилиб кейинги босқичдан ўтиш учун “Б блок”ка йўналтирилади.
Бунда транспорт воситаларининг ҳаракатланиши йўл ётиқ чизиқлари, ажратувчи тўсиқ ва автоматик шлагбаумлар ёрдамида тартибга солинади. Маълумот учун, биринчи босқичда инсон омили иштирок этмайди.
II-босқич
Транспорт воситасини техник ва экологик кўрикдан ўтказиш (Б блок). ДЙҲХХ ходими томонидан транспорт воситасининг агрегат ва кузов рақамлари ҳужжатларга мослиги текширилиб, электрон планшет орқали рўйхатга олинади ва давлат рақам белгиси электрон тартибда бириктирилади.
Диагностика марказининг техник мутахассиси томонидан транспорт воситасидан экологияга чиқаётган зарарли моддалар миқдори текширилади. Транспорт воситасини техник ва экологик кўрикдан ўтказиш якунида электрон тизим орқали квитанция шакллантирилади ва ҳайдовчининг телефонига SMS шаклида хабарнома юборилади.
Ҳайдовчи тўловларни мобил илова, электрон тўлов тизимлари ёки бевосита йўлакларда ўрнатилган тўлов терминаллари орқали амалга оширади. Транспорт воситаси кейинги босқичга ўтиш учун махсус ташкил этилган ва электрон монитор ҳамда радиотўлқин тарқатадиган кутиш майдонига йўналтирилади.
III-босқич
Транспорт воситасига давлат рақам белгисини бириктириш ва тайёр бўлган қайд этиш гувоҳномасини тақдим этиш. (C блок) Электрон монитор ҳамда радиотўлқин орқали навбати келгани ҳақида маълумот олган транспорт воситаси тайёр ҳужжатларни тақдим этиш йўлагига ҳаракатланади.
Мазкур йўлакда техник ходим томонидан транспорт воситасига давлат рақам белгиси бириктирилади ва қайд этиш гувоҳномаси топширилади. Шу билан бирга, экологик текширув натижасидан келиб чиқиб “қизил”, “сариқ” ёки “яшил” ёрлиқ (стикер) транспорт воситасининг олд ойнасига ёпиштирилади.
Маълумот учун, рўйхатдан ўтказиш ва экологик диагностика марказида фуқароларга қўшимча қулайлик яратиш ва босқичлардан ўтишда кўмаклашиш мақсадида ҳар бир босқич ўтказиладиган ҳудудларга йўналтирувчи ходимлар бириктирилади.
Маълум қилинишича, авваллари ДЙҲҲХ органларида автомототранспорт воситасини рўйхатдан ўтказиш жараёни 6-7 босқичда амалга оширилган бўлса, ҳозирда мазкур босқичлар сони учтага қисқаради. Натижада сарфланадиган вақт аввалги 2 соатдан 15-20 дақиқагача қисқаради.
Ҳозирги кунда 3 босқичли янги тизим Тошкент шаҳридаги “Юнусобод”, “Чилонзор” ва “Узбум-Миробод” рўйхатлаш бўлинмаларида синовдан ўтказилмоқда.
Изоҳ (0)