Путин Киев билан можарони музлатишни таклиф қилганмиди? Песков жавоб берди

Президент матбуот котиби Дмитрий Песков Владимир Путин Украинадаги можарони музлатиш таклифи билан чиққанини рад этди. Бу ҳақда “Коммерсант” хабар берди. 

Бир кун аввал Reuters Россия АҚШга Украинада ўт очишни тўхтатиш таклифи билан чиққани, бироқ АҚШ бу таклифни рад этгани ҳақида хабар берган эди.“Йўқ, бу ҳақиқат эмас”, деди Кремль вакили агентлик нашрига изоҳ бериш вақтида. Reuters’га кўра, Путин можарони музлатиш таклифини илгари сурган  ва Россия босиб олган ҳудудлардан ҳеч бирини қайтаришни истамаган.

Исмини ошкор этмаган рус манбасининг агентликка айтишича, Вашингтон Киевга босим ўтказишни истамагани учун “америкаликлар билан музокаралар натижа бермаган”. Давлат департаменти Қўшма Штатлар Украинада Россия билан ўт очишни тўхтатиш бўйича музокаралар ўтказмаганини айтган.

Февраль ойида америкалик журналист Такер Карлсонга берган интервьюсида Россия президенти Россия ва Украина “эртами-кечми, келишувга эриша олишини” айтган. Унинг фикрича, Украина АҚШ кўрсатмаси билан Россия билан музокара қилишдан бош тортган. Суҳбатдан сўнг Карлсон Владимир Путин Украина бўйича муроса қилишга тайёр, деган фикрни билдирган эди.