Украина ташқи ишлар вазири Дмитрий Кулеба агар Украинанинг қурол-яроғлари тугаса, украиналиклар “белкурак билан жанг қилишини” маълум қилди. Бу ҳақда ABC Nеwс хабар берди.
Дмитрий Кулеба АҚШ Конгрессининг Украинага ҳарбий ёрдамни молиялаштириши бўйича янги келишувни қабул қилиши учун “вақт тугаётганини” айтди. У Украинага кўпроқ пул ажратилиши Америка қўшинлари аралашишга мажбур бўладиган НАТО ва Россия ўртасидаги тўғридан тўғри қарама-қаршиликдан қочишга ёрдам беришини билдирди.
“Ҳозир Украинани қўллаб-қувватлашнинг нархи қанча бўлишидан қатъи назар, агар Украина мағлуб бўлса, дунёдаги тартибсизликларни тузатиш нархи анча юқори бўлади. Агар Ғарб Украинада Россиянинг ҳаракатларини тўхтата олмаса, унда дунёнинг бошқа минтақаларида буни ким тўхтата олади? Қуролимиз тугаса ҳам, белкурак билан жанг қиламиз, чунки Украина халқининг мавжудлиги хавф остидаги масала”, — деди Украина ташқи ишлар вазири.
Кулеба Украина жанг майдонида анча кучлироқ мавқега эга бўлмагунча, Путин режими билан ҳар қандай музокаралар ўтказишни рад этди.
У Россия армияси “сабоқ олганини” ва ҳозир “бу уруш учун анча яхши мослашганини” тан олди, лекин бу йил Россия учун “кўпроқ мағлубиятлар” бўлишини башорат қилди.
Рус қўшинлари сўнгги ҳафталарда жанг майдонида ўзига ишончи ортиб, Украина шарқида шиддатли жанглар кечаётган Авдеевка шаҳри атрофидаги кичик ҳудудларни эгаллаб олди. Бироқ Украина ташқи ишлар вазири Россиянинг бу “минимал” ютуқлари “жуда катта харажат” билан келганини айтди ва ҳозир Россия жанг майдонида устунликка эга, деган фикрни рад этди.
Нашрнинг қайд этишича, сўнгги ойларда Украина Россиядаги нишонларга портловчи моддалар ўрнатилган дронларни учирди.
“Президент Путин ўз халқига буларнинг барчаси нима учун содир бўлаётганини тушунтириши керак. Менимча, вақти-вақти билан (Россия аҳолиси — таҳрир) уларнинг телевизорлари ташқарисидаги воқелик бошқача экани ва уларнинг тарғиботидан ҳам ёмонроқ бўлиши мумкинлигини англаб етиш фойдалидир”, — дея хулоса қилди Кулеба.
Изоҳ (0)