НАТО бош котиби Йенс Столтенбергнинг айтишича, альянс ядро қуролига эга бўлган аъзо давлатлар сонини кўпайтириш ниятида эмас. Шунингдек, унинг қўшимча қилишича, блок Швецияда янги жанговар бўлинмаларни жойлаштирмоқчи эмас.
“Биз ядро қуролига эга давлатлари сонини кенгайтиришни режалаштирмаяпмиз. Шунингдек, биз доимий равишда ўз куч-салоҳиятимизни баҳолаймиз ва ҳозирда Швецияда янги жанговар гуруҳлар ташкил этиш режаси йўқ”, — деди Столтенберг Швеция бош вазири Улф Кристерссон билан қўшма матбуот анжуманида.
Альянс бош котибининг сўзларига кўра, Швеция ва Финляндиянинг НАТОга аъзо бўлиши бутун альянсга, хусусан, Шимолий ва Болтиқбўйи мамлакатларига ижобий таъсир кўрсатади. Матбуот анжумани чоғида Йенс Столтенберг айни дамда альянс Россиядан ҳарбий таҳдид кўрмаётганини қўшимча қилди.
У, шунингдек, айрим мамлакатларнинг Украинага узоқ масофали тизимлар етказиб бериш ҳақидаги қарорини маъқуллаганини айтди.
Швеция 7 март куни расман НАТОга қўшилди. Бугун, 11 март куни альянснинг Бельгиядаги қароргоҳида Швеция байроғини кўтариш маросими бўлиб ўтди.
Изоҳ (0)