Гондураснинг собиқ президенти Хуан Орландо Эрнандес гиёҳванд моддалар савдогарлари билан тил бириктириб, тонналаб кокаиннинг АҚШга назоратсиз киришини таъминлаш учун ўзининг ҳарбий ва миллий полициясидан фойдаланди. Бу ҳақда тегишли манбаларга таяниб, Euronews хабар берди.
Бу айбловлар камида мажбурий 40 йиллик қамоқ жазосини ва максимал умрбод қамоқ жазосини ўз ичига олади. Ҳукм 26 июнга белгиланган, бироқ Эрнандеснинг адвокати Сабрина Шрофф аллақачон апелляция шикояти берилишини айтган.
Прокурор Дамиан Уильямс ўз баёнотида айбдорлик ҳукми шунга ўхшаш йўлдан боришни истаган барча коррупционэр сиёсатчилар учун сигнал бўлиб хизмат қилишига умид билдирган.
55 ёшли Эрнандес 2014 йилдан 2022 йилгача Гондурас президенти бўлган. У лавозимини тарк этганидан уч ой ўтгач, пойтахт Тегусигалпадаги уйида ҳибсга олинган ва ўша йилнинг апрель ойида АҚШга экстрадиция қилинган.
АҚШ прокуратураси Эрнандесни 2004 йилдаёқ гиёҳванд моддалар савдогарлари билан ҳамкорлик қилганликда айблаб, у қишлоқ конгрессменидан Миллий Конгресс президенти, кейин эса мамлакатдаги энг юқори лавозимга кўтарилгунигача миллионлаб пора олганини айтган эди.
Эрнандес суд жараёнида берган кўрсатмасида Гондурасдаги деярли барча сиёсий партиялар наркобаронлардан пул олганини айтган, бироқ ўзи пора олганини рад этган.
Суд жараёнида гувоҳлар орасида ўнлаб қотилликлар учун жавобгарликни тан олган гиёҳванд моддалар савдогарлари иштирок этган.
Изоҳ (0)