2014 йилдан буён йиғилаётган маълумотларга кўра, 2023 йилда дунё бўйлаб миграция йўлларида энг кўп одам ҳалок бўлган. Бу ҳақда БМТ Халқаро миграция ташкилотининг (ХМТ) “Йўқолган муҳожирлар” лойиҳаси ўзининг Х ижтимоий тармоғидаги саҳифасида хабар берди.
Хабарга кўра, БМТ Халқаро миграция ташкилотининг (ХМТ) бедарак йўқолган муҳожирлар лойиҳаси 2023 йилда жами 8565 нафар муҳожир ҳалок бўлганини қайд этган, бу 2022 йилга нисбатан 20 фоизга кўп. Аввалги энг юқори кўрсаткич 8 084 ўлим билан 2016 йилда қайд этилган.
Мигрантларнинг 50 фоизга яқини сувда чўкиш, тўққиз фоизи автоҳалокатлар ва етти фоизи зўравонлик оқибатида ҳалок бўлган.
10 йил аввал “Йўқолган муҳожирлар” лойиҳаси бошланганидан бери ҳалок бўлган 63 700 дан ортиқ одамнинг деярли ярми Ўрта Ер денгизида ҳалок бўлган. Мазкур маълумотларга кўра, Ўрта Ер денгизи энг хавфли миграция йўли бўлиб қолмоқда, ўтган йили у ерда камида 3129 нафар киши, 2024 йилнинг икки ойида эса 254 нафар муҳожир ҳалок бўлган.
ХМТнинг таъкидлашича, статистик маълумотларга фақат тасдиқланган ўлимлар киритилгани сабабли ҳақиқий рақамлар сезиларли даражада юқори бўлиши мумкин. Мисол учун, муҳожирларни ноқонуний ташиш билан шуғулланадиган кема тунда қирғоқдан чиқиб кетса ва кейинчалик ҳеч қаерда кўринмаса, кемадаги одамларнинг ўлими ҳужжатсиз қолади.
ХМТнинг “Йўқолган муҳожирлар” лойиҳаси 2014 йилда Италиянинг Ўрта Ер денгизидаги Лампедуза ороли қирғоқларида икки кема ҳалокатга учраши оқибатида кўплаб қурбонлар бўлганидан кейин бошланган эди.
Изоҳ (0)