Йенс Столтенберг: “Украинанинг НАТОга қабул қилиниши барча иттифоқчиларнинг розилиги билан амалга оширилади”

НАТО бош котиби Йенс Столтенбергнинг айтишича, Украинанинг альянсга қўшилиши Киев зарур шартларни бажарганидан сўнг дарҳол амалга ошади.

Шунингдек, у барча иттифоқчилар бу қарорни қўллаб-қувватлашига умид билдирди. Столтенбергнинг сўзларига кўра, мамлакат НАТОга аъзо бўлишга ҳар қачонгидан ҳам яқинроқ.

“Украина ҳозир ҳар қачонгидан ҳам НАТОга яқин... Альянсга қабул қилиш барча иттифоқчилар бунга рози бўлганда ва бунинг учун барча шартлар бажарилганда амалга оширилади”, — деди Столтенберг. 

Бош котибнинг айтишича, альянс Украинага миллион дона дрон етказиб беришни режалаштирмоқда. Бундан ташқари, 20 иттифоқчи миналардан тозалаш коалициясида иштирок этишга рози бўлди. Йенс Столтенбергнинг қўшимча қилишича, НАТО Польшада Украина учун янги ўқув маркази ташкил этишга қарор қилган.

АҚШ президенти Жо Байден Украина президенти Владимир Зеленский билан музокарадан сўнг Украина “шубҳасиз НАТОга қўшилиши”ни айтганди. Унга кўра, қўшилиш масаласи мамлакатда ҳарбий ҳаракатлар тўхтатилгандан кейин кўриб чиқилади.