Инсонлар хинадан табиий бўёқ сифатида кўп асрлардан бери фойдаланиб келишади, уни ёрқин ранги ва сочларни мустаҳкамлаш хусусияти учун ҳам бошқа воситалардан афзал кўришади.
_1664545133_1664545210.jpg)
Хина Африка, Ўрта Шарқ минтақасининг иссиқ иқлимга эга мамлакатларида ўсувчи лавсония ўсимлигидан олинган кукун бўлиб, таркибида табиий бўёқ – танин сақланади. Хинанинг фойдали хусусиятлари ҳам талайгина – у тери касалликлари, яралар, куйиш жароҳатларини даволашга ёрдам беради, ортиқча терлашдан халос этади. Сочлар масаласига келсак, хина уларга ўзига хос ранг бериш билан бирга қазғоқларни йўқ қилиш, толалар тузилишини мустаҳкамлашга кўмаклашади, сочлар илдизини озиқлантиради, ўсишини тезлаштиради ва уларга ҳажм беради.
Хинадан табиий бўёқ сифатида фойдаланувчи тажрибали мутахассислар якуний ранг ҳар бир одамда турлича бўлишини таъкидлайдилар. Сочларни хина билан бўяганда толалар ҳар доим қизғиш рангга кириши – янглиш фикр.
Хина кукуни ўсимлик мойи ва мева кислоталаридан тайёрланадиган махсус бўёқлар ичига ҳам қўшилади. Бундай бўёқлар одатда бош терисини тинчлантирувчи ўсимликлар, Е витамини ҳамда протеинга бой бўлади. Мутахассислар шундай таркибга эга бўёқлар ёрдамида сочларни 30 дан ортиқ рангларга бўяш усулларини ўйлаб топишган. Уларнинг айтишларича, ҳар бир аралашма соч тузилиши, ранги ва аввал фойдаланилган бўёқлардан келиб чиққан ҳолда индивидуал тарзда тайёрланади.
Сочларингиз ўзингиз истамаган ёрқинликдаги қизғиш рангга (баъзан якуний ранг яшил бўлиши мумкин) бўялишини хоҳламасангиз, хинадан уй шароитида фойдаланишни тавсия қилмаймиз. Сочларни хина билан бўяшда аралашма таркибини тўғри танлаш, бўёқни сочларда қолдириш вақтини аниқ белгилаш, унинг қолдиқларини ювиб ташлаш, хинанинг ўткир ҳидидан халос бўлиш ва ранг узоқроқ сақланиб туриши учун керакли воситалардан фойдаланиш муҳим аҳамият касб этади.
Сочларни хина билан бўяшдан аввал унинг рангини бошқа турдаги бўёқлар билан “беркитиб” бўлмаслигини ёдга олинг. Айнан шунинг учун ҳам натижа сиз истагандек бўлишига ҳаракат қилинг.
Бугунги кунда малла ранг сочлар урфга қайтмоқда, европалик хонимлар эса сочларини бир хил рангга бўяб, толаларнинг айримларига бир оз ўзгача тус беришмоқда. Хина бу борада сизга ҳам қўл келади: унинг ёрдамида бир вақтнинг ўзида ҳам табиий, ҳам ўзига хос ранг ҳосил қилса бўлади.
Изоҳ (0)