Ҳиндистон ҳукумати 13 та объектда ўтказилган рейдлар чоғида ҳиндистонликларни Украинадаги урушда қатнашиш учун Россияга жўнатаётган уюшган тармоқ аъзоларини қўлга олди. Бу ҳақда Ҳиндистон Марказий тергов бюроси (CBI) маълумотига таяниб, Hindustan Times хабар берди.
Рейдлар давомида мамлакат бўйлаб одам савдоси билан шуғулланувчиларнинг катта тармоғи фош бўлган, улар хорижда юқори маошли ишлар ваъда қилиб, ёшларни ўзига жалб қилган. Гумонланувчилар ижтимоий тармоқлар ва маҳаллий агентлар орқали ҳиндистонликларни Россияда юқори маошли ишларга жалб қилган, — дейилади CBI баёнотида.
CBI’га кўра, одам савдоси қурбони бўлган ҳиндистонликлар “ўз хоҳишларига кўра” ҳарбий тайёргарликдан ўтказилган ва Россия-Украина уруши ҳудудидаги ҳарбий базаларга юборилган. Ҳиндистон ҳукумати ҳиндистонликларни Россия армиясига юборишнинг 35 та ҳолатидан хабардор.
Аввалроқ, февраль охирида Ҳиндистон Ташқи ишлар вазирлиги Москвадан 100 га яқин фуқароларини Россия Қуролли кучлари сафидан “эрта ишдан бўшатиш”ни сўраган.
20 февраль куни The Hindu рус армиясида “ёрдамчи” сифатида ишлашни кутган камида учта ҳиндистонлик алданиб, фронтга жўнатилгани ҳақида хабар берган. 7 март куни Ҳиндистоннинг Москвадаги элчихонаси ўз фуқароси Муҳаммад Асфаннинг вафот этганини тасдиқлаган. Унинг акаси аввалроқ “тузоққа тушиб қолгани” ва Россиянинг Украинага қарши урушига жўнатилганини айтган эди.
Изоҳ (0)