Фарғонада ҳоким қарори билан хусусий секторга бериб юборилган шаҳар марказидаги “Ёшлар кўли” ҳудуди Спорт вазирлигига қайтарилади. Бу ҳақда Давактив агентлиги матбуот хизмати хабар берди.
Бугун Хайрулло Бозоровнинг қарори билан Фарғона шаҳри марказидаги “Ёшлар кўли” ҳудуди меҳмонхона, ресторан, савдо мажмуаси ва турар жой қуриш учун очилганига ҳали бир ой тўлмаган фирмага бериб юборилгани ҳақида хабар берилган эди.
Давактивга кўра, ушбу объект Спорт вазирлиги томонидан самарали фойдаланиш учун Фарғона шаҳар ҳокимлиги балансига Фарғона вилоят ҳокимининг 2022 йил 30 декабрдаги қарорига асосан ўтказиб берилганлиги, бироқ ҳокимлик томонидан объектга нисбатан кадастр ҳужжатлари расмийлаштирилмаганлиги аниқланган.
Ушбу ҳолатда, “Давлат мулкини бошқариш тўғрисида”ги қонун билан белгиланган тартиб талаблари бажарилмаган. Хусусан, қонун талабларига кўра, давлат кўчмас мулк объектларини, идоравий мансублигидан қатъи назар, оператив бошқарув ҳуқуқи асосида бир давлат муассасаси ёки давлат унитар корхонасидан бошқа давлат муассасаси ёки давлат унитар корхонасига ўтказиш тўғрисида қарор Давактив агентлиги томонидан тегишли давлат органлари билан келишувга кўра қабул қилиниши белгиланган.
Шунга кўра, амалдаги қонунчилик билан белгиланган тартиблар бузилганлиги муносабати билан Давактив агентлиги томонидан Спорт вазирлигига объектни спорт мактаби балансига қайтариб олиш ҳамда вилоят ҳокимлигига объектни шаҳар ҳокимлиги балансига ўтказиш ва Унайс буилдинг МЧЖга фойдаланишга бериш тўғрисидаги қарорларни бекор қилиш бўйича тегишли кўрсатмалар юборилган.
Давактив агентлиги томонидан ушбу давлат мулки объектини тегишли спорт мактаби балансига қайтариш масаласи қатъий назоратга олинган.
Изоҳ (0)