Хайрулло Бозоровнинг қарори билан Фарғона шаҳри марказидаги “Ёшлар кўли” ҳудуди меҳмонхона, ресторан, савдо мажмуаси ва турар жой қуриш учун очилганига ҳали бир ой тўлмаган фирмага бериб юборилди.
ЎзАнинг ёзишича, сахни 2,2 гектар бўлган сунъий кўл 2020 йилда таъмирланган, ободонлаштирилган, чор атрофига тоза сув билан таъминлаб туриш учун тик қудуқлар чиқарилган эди. 2021 йилга келиб ва ундан кейинги уч йил давомида у сув билан тўлдирилмади, ёзда ҳам фаолият кўрсатмади.
“Фарғона шаҳридаги бу кўл келажакда иқтидорли ёш спортчиларни танлашда энг асосий ўринга эга дегандим. Мана энди ҳозирга келиб, ҳавзада сув йўқ, уни тўлдириш имконияти бўлмади. Тик қудуқ орқали олинаётган сув учун сарфланган электр қувватига пул топилмади. Шунинг учун аста-секинлик билан барча машғулотларимиз тўхтаб қолди. Кўл кўп хизмат қилиши керак эди бу спорт тури учун”, — деган Фарғона вилояти Каное федерацияси ижрочи директори Насриддин Холиқов ўшанда “Фарғона ҳақиқати” газетасида эълон қилинган таҳлилий мақолада.
Куни кеча эса Фарғона марказидаги “Ёшлар кўли”да бузиш ишлари бошланди. Маълум бўлишича, у Фарғона вилояти ҳокимининг 2024 йил 29 январдаги қарорига кўра рўйхатдан ўтганига ҳали бир ой ҳам тўлмаган Unays building МЧЖга меҳмонхона, ресторан, савдо мажмуаси ва турар жой қуриш шарти билан доимий муддатга бириктириб берилган.
Амалдаги қонунчилик ва меъёрий ҳужжатларда ер майдони эмас, балки бўш турган биноларгина тадбиркорлик фаолиятини олиб бориш учун фойдаланиб туришга бириктирилиши мумкинлиги белгиланган.
Давлат активларини бошқариш агентлиги Фарғона вилояти ҳудудий бошқармаси бошлиғининг ўринбосари Дилшод Тўлқиновнинг билдиришича, олди-сотди шартномаси расмийлаштирилмаган, сабаби — объект сотилмаган, тадбиркорга фойдаланишга берилган.
“Миллий тикланиш” партияси ҳолатга муносабат билдириб, амалдаги қонунчиликка мувофиқ, ҳокимларнинг ер бериш бўйича қарор қабул қилиш ваколати тугатилганини, шу нуқтайи назардан, Фарғона вилояти ҳокимининг мазкур қарори қайта кўриб чиқилиши ва бекор қилиниши шарт эканини маълум қилди.
“Зеро, Фарғона аҳлига, айниқса ёшларга спорт билан шуғулланиш учун хизмат қилган ҳудуд тақдирини битта қарор билан ўзгартириб юбориш бугунги кун талабига ҳам, бугунги кун қонунчилигига ҳам зиддир”, — дейилади муносабатда.
Шундан келиб чиққан ҳолда “Миллий тикланиш” демократик партияси бундай ноқонуний қарор чиқариш амалиётини кескин қоралади ва Бош прокуратурани ушбу масалага ҳуқуқий баҳо берилишга чақирди.
Маълумот учун, президент фармони билан 2021 йил 1 августдан бошлаб ҳокимликларнинг ерни тўғридан тўғри ажратиш, фойдаланишга бериш, захиралаш, бириктириш, ободонлаштириш учун бериш ёки ерларни бошқача йўл билан тасарруф қилишга оид ваколатлари бекор қилинган.
Фарғона вилояти ҳокимлиги бу борада ҳозирча расмий муносабат билдирмади.
Изоҳ (0)