Farg‘onada hokim qarori bilan xususiy sektorga berib yuborilgan shahar markazidagi “Yoshlar ko‘li” hududi Sport vazirligiga qaytariladi. Bu haqda Davaktiv agentligi matbuot xizmati xabar berdi.
Bugun Xayrullo Bozorovning qarori bilan Farg‘ona shahri markazidagi “Yoshlar ko‘li” hududi mehmonxona, restoran, savdo majmuasi va turar joy qurish uchun ochilganiga hali bir oy to‘lmagan firmaga berib yuborilgani haqida xabar berilgan edi.
Davaktivga ko‘ra, ushbu obyekt Sport vazirligi tomonidan samarali foydalanish uchun Farg‘ona shahar hokimligi balansiga Farg‘ona viloyat hokimining 2022-yil 30-dekabrdagi qaroriga asosan o‘tkazib berilganligi, biroq hokimlik tomonidan obyektga nisbatan kadastr hujjatlari rasmiylashtirilmaganligi aniqlangan.
Ushbu holatda, “Davlat mulkini boshqarish to‘g‘risida”gi qonun bilan belgilangan tartib talablari bajarilmagan. Xususan, qonun talablariga ko‘ra, davlat ko‘chmas mulk obyektlarini, idoraviy mansubligidan qatʼi nazar, operativ boshqaruv huquqi asosida bir davlat muassasasi yoki davlat unitar korxonasidan boshqa davlat muassasasi yoki davlat unitar korxonasiga o‘tkazish to‘g‘risida qaror Davaktiv agentligi tomonidan tegishli davlat organlari bilan kelishuvga ko‘ra qabul qilinishi belgilangan.
Shunga ko‘ra, amaldagi qonunchilik bilan belgilangan tartiblar buzilganligi munosabati bilan Davaktiv agentligi tomonidan Sport vazirligiga obyektni sport maktabi balansiga qaytarib olish hamda viloyat hokimligiga obyektni shahar hokimligi balansiga o‘tkazish va Unays building MCHJga foydalanishga berish to‘g‘risidagi qarorlarni bekor qilish bo‘yicha tegishli ko‘rsatmalar yuborilgan.
Davaktiv agentligi tomonidan ushbu davlat mulki obyektini tegishli sport maktabi balansiga qaytarish masalasi qatʼiy nazoratga olingan.
Izoh (0)