Халқ депутатлари Гулистон шаҳар Кенгашининг навбатдан ташқари сессияси бўлиб ўтди. Унда Сирдарё вилояти ҳокими Акмал Маҳмудалиев иштирок этди, деб хабар беради вилоят ҳокимлиги матбуот хизмати.
Ҳудуддаги аҳвол кескин танқид қилинган сессияда шаҳарнинг ижтимоий-иқтисодий соҳаларида мавжуд қатор муаммолар, йўл қўйилган камчиликлар санаб ўтилган. Хусусан, аҳоли мурожаатларини ҳал этиш, ободонлаштириш бўйича ишлар қониқарсизлиги, шаҳар мастер режаси охирига етказилмаган, экспорт масаласида аҳвол ёмон экани, айниқса, қурилиш ишларида ўзибўларчиликка йўл қўйилаётгани кескин танқид қилинган.
Вилоят ҳокими Акмал Маҳмудалиев Гулистон шаҳар ҳокими лавозимига Жамолиддин Хожиманов номзодини тавсия қилган. Халқ депутатлари Гулистон шаҳар Кенгашининг қарори билан у Гулистон шаҳар ҳокими этиб тайинланди.
Жалолиддин Хожиманов 1987 йилда Сардоба туманида туғилган. Маълумоти – олий. 2011 йил Тошкент давлат аграр университетини тамомлаган. Мутахассислиги бухгалтерия ҳисоби ва аудит.
У меҳнат фаолияти давомида Тошкент вилояти ва Тошкент шаҳрида молия ва иқтисодиёт соҳаларида турли ташкилотларда масъул вазифаларда ишлаган. Тайинловга қадар Чилонзор туман ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари — иқтисодий тараққиёт ва камбағалликни қисқартириш бўлими бошлиғи лавозимида фаолият юритиб келаётган эди.
2019 йил февралдан буён Гулистон шаҳри ҳокими лавозимида ишлаб келган Тўлқинжон Дадабаев февраль ойи бошларида соғлигидаги муаммолар сабаб ўз аризасига биноан лавозимдан озод этилган, шаҳар ҳокими вазифасини вақтинча бажариш шаҳар ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари Ғайрат Ботировга юкланган эди.
Изоҳ (0)