Украина ҳарбийлари Донецк яқинидаги Авдеевка ҳудудида рус қўшинлари билан бўлган жангларда 500 нафарга яқин аскарини йўқотган. Бу ҳақда “ТАСС” нашри хабар берди.
Хабарда айтилишича, Россия кучлари 5 март куни Донецк Халқ Республикаси ҳудудида Украина армиясининг С-300 ва “Бук” зенит-ракета мажмуаларини йўқ қилган. Мазкур техникалар Киев кучлари учун асосий ҳужум қуроли бўлган.
Россия жанговар бўлинмалари фаол ҳаракатлар натижасида ўтган кун давомида Авдеевка ҳудудидаги янада қулай жойлар ва позицияларни эгаллаб олгани хабар қилинган. Донецк Халқ Республикасининг Нетаилово, Новосёловка Первая ва Торецк аҳоли пунктлари яқинида Украина армиясининг 24, 31, 47 ва 61-механизациялашган бригадалари шахсий таркиби ва ҳарбий техникасига жиддий зарба берилгани айтилган.
Шунингдек, Украина армиясининг Кирово, Бердичи ва Шуми аҳоли пунктлари яқинидаги учта ҳужуми қайтарилган. Украина томони 500 нафарга яқин шахсий таркиби, 4 та зирҳли жанговар техникасини йўқотгани хабар берилган.
Россия даъво қилаётган Донецкдаги сўнгги ҳужумлар ҳақида Украина томони муносабат билдирмаган. Сўнгги бор Киев ҳарбий маъмурияти Донецкка Россия томонидан ҳарбий ҳужум уюштирилгани муносабати билан баёнот берган эди.
Изоҳ (0)