Ukraina harbiylari Donetsk yaqinidagi Avdeyevka hududida rus qo‘shinlari bilan bo‘lgan janglarda 500 nafarga yaqin askarini yo‘qotgan. Bu haqda “TASS” nashri xabar berdi.
Xabarda aytilishicha, Rossiya kuchlari 5-mart kuni Donetsk Xalq Respublikasi hududida Ukraina armiyasining S-300 va “Buk” zenit-raketa majmualarini yo‘q qilgan. Mazkur texnikalar Kiyev kuchlari uchun asosiy hujum quroli bo‘lgan.
Rossiya jangovar bo‘linmalari faol harakatlar natijasida o‘tgan kun davomida Avdeyevka hududidagi yanada qulay joylar va pozitsiyalarni egallab olgani xabar qilingan. Donetsk Xalq Respublikasining Netailovo, Novosyolovka Pervaya va Toretsk aholi punktlari yaqinida Ukraina armiyasining 24, 31, 47 va 61-mexanizatsiyalashgan brigadalari shaxsiy tarkibi va harbiy texnikasiga jiddiy zarba berilgani aytilgan.
Shuningdek, Ukraina armiyasining Kirovo, Berdichi va Shumi aholi punktlari yaqinidagi uchta hujumi qaytarilgan. Ukraina tomoni 500 nafarga yaqin shaxsiy tarkibi, 4 ta zirhli jangovar texnikasini yo‘qotgani xabar berilgan.
Rossiya daʼvo qilayotgan Donetskdagi so‘nggi hujumlar haqida Ukraina tomoni munosabat bildirmagan. So‘nggi bor Kiyev harbiy maʼmuriyati Donetskka Rossiya tomonidan harbiy hujum uyushtirilgani munosabati bilan bayonot bergan edi.
Izoh (0)