Фарғона вилояти Олтиариқ туманида субсидия маблағларини ўзлаштирган фермер хўжаликлари аниқланди, деб хабар беради Бош прокуратура ҳузуридаги департамент.
Қайд этилишича, департаментнинг Олтиариқ туман бўлими томонидан терговга қадар текширувлар ўтказилган. Текширувлар давомида “А.С.” ҳамда “И.Й.” фермер хўжаликлари масъул шахслари “М.Б.” хусусий корхонаси раҳбари Р.М. билан ўзаро тил бириктириб, ушбу фермер хўжаликлари ер майдонларига ҳақиқатда ўрнатилмаган 14 629 дона шпалер (ўсимликларни тутиб туришга мўлжалланган конструкция) учун жами 219,3 миллион сўм миқдорида субсидия маблағлари ажратилишига эришиб, ушбу маблағларни “М.Б.” хусусий корхонаси орқали нақдлаштириб олгани аниқланган.
Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш), 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Хоразм вилоятида 1,4 миллиард сўм кредит маблағини ноқонуний четга олиб чиққан шахслар аниқлангани тўғрисида хабар берилганди.
Изоҳ (0)