Давлат раҳбари Фарғона вилояти Бағдод туманидаги “Хитой” маҳалласида бўлиб, аҳоли турмуши билан яқиндан танишди. Бу ҳақда Президент матбуот хизмати хабар берди.
Бу ерда 2 минг 800 нафарга яқин аҳоли яшайди. Одамлар томорқадан унумли фойдаланади. Аёллар тикувчилик билан шуғулланади. Чорвачилик, паррандачилик, балиқчилик рўзғорларга барака киритган. Ўндан ортиқ савдо дўконлари, мебелсозлик корхонаси, сартарошхона, тикувчилик ва ҳунармандчилик устахоналарида аҳоли иш билан банд. Шунингдек, ёшларнинг спорт билан шуғулланиши учун яхши шароит бор. Маҳаллада охирги икки йилда бирорта жиноят содир этилмаган.
Давлат раҳбари шу ерлик Абдуғаффор Ҳалилов хонадонида бўлиб, маҳалла вакиллари билан суҳбатлашди.
“Бугун келиб, Фарғонадаги ривожланишни, маҳаллалардаги шароитни кўриб хурсанд бўлдим. Ислоҳотларни ҳар бир инсон ўз ҳаётида ҳис қилиши учун ҳамма ишларни қуйи тизимда ташкил этяпмиз. Фарғона вилоятида 1062 та маҳалла бор. Улардаги муаммоларни, муҳтож оилаларнинг талаб-истакларини жойида ҳал этиб, одамларни рози қилиш зарур. Барча раҳбарлар дунёқарашини ўзгартириб, халқимизга муносиб бўлиб, меҳнат қилиши керак”, — деди Шавкат Мирзиёев.
Суҳбатда нуронийлар сўнгги йилларда маҳалла қиёфаси яхшилангани, “Очиқ бюджет” ташаббуси орқали кўчалар обод бўлганини айтди. Хусусан, 5 километр ички йўлга асфалт ётқизилган. Электр тармоқлари ва трансформатор янгиланган.
Президент суҳбатда билдирилган фикрларни қўллаб-қувватлаб, маҳалла идорасини таъмирлаш, мактаб учун қўшимча бино қуриш бўйича кўрсатмалар берди. Ёшларни ўқитиш ва ҳунар ўргатиш, бўш вақтларини мазмунли ташкил этиш муҳимлиги ҳақида сўз юритилди.
Президентнинг Фарғона вилоятига ташрифи
Шавкат Мирзиёев аҳоли ҳаёти, ҳудудлар иқтисодиёти билан танишиш мақсадида 27 июль куни Фарғона вилоятига келди. Давлат раҳбари ташрифни “Хайрулло Баҳром Бойматов” фермер хўжалиги томонидан 75 гектарда ташкил этилган узумчилик плантациясига келиш билан бошлади.
Шундан сўнг Қўқон шаҳрида президент Шавкат Мирзиёев раислигида йиғилиш бўлиб ўтди. Унда президент тўғридан тўғри хорижий инвестиция жалб қилиш бўйича Фарғона вилоятидаги айрим туман ва шаҳарларнинг кўрсаткичлари қониқарсизлигини кўрсатиб ўтди, саноат ҳажми бўйича республикада 12-ўринга тушиб қолгани танқид қилинди, қатор ҳокимлар ва бошқарма бошлиқлари лавозимидан озод қилинди, туманларнинг барчаси йил якунигача 100 млн доллардан инвестиция жалб қилиши мумкинлиги айтилди, Қувада лойиҳалар ишга тушиши натижасида 10 мингдан зиёд иш ўрни яратиш мумкинлиги ва бу лойиҳалар ҳисобига хориждаги 6 минг нафар мигрантимизни қайтиб келиши учун муҳит яратилиши қайд этилди.
Шунингдек, давлат раҳбари вилоятда жиноятчилик ва ҳуқуқбузарликларга қарши курашиш масаласига алоҳида тўхталиб, бу борадаги ишлар аҳволи қониқарсизлигини танқид қилди. Фаолиятида йўл қўйган камчиликлар учун Фарғона вилояти ички ишлар бошқармаси бошлиғи М.Жўраев лавозимидан озод этилди.
Изоҳ (0)