Shavkat Mirziyoyev Xonobodda qo‘ziqorin yetishtirish bilan shug‘ullanuvchi oila xonadonida mehmon bo‘ldi

Shavkat Mirziyoyev Xonobod shahri ‘‘Yangi hayot’’ mahallasida yashovchi Salohiddin Usmonov xonadonida mehmon bo‘ldi. Bu haqda Prezident matbuot xizmati xabar berdi.

Oila boshlig‘i rafiqasi Ziyoda opa bilan ikki farzandni voyaga yetkazgan. Hovli obod. Uy zamonaviy qiyofaga ega, tomiga quyosh panellari o‘rnatilgan. Shuningdek, energiya tejamkor alohida isitish tizimi barpo etilgan.

So‘nggi yillarda Xonobodda turizm rivojlanmoqda. Infratuzilma yaxshilanib, sayyohlar jalb etilmoqda. Bu imkoniyatlardan foydalanib, xonadonda uy mehmonxonasi tashkil etilgan.

Salohiddin Usmonov qishloq xo‘jaligi mutaxassisi. Ular qo‘ziqorin yetishtirish bilan ham shug‘ullanadi.

Prezident bunday omilkorlikni maʼqullab, boshqa joylarda ham qo‘llash muhimligini taʼkidladi.

Har bir mahallaning o‘z imkoniyatlari, anʼanalari, odamlarning xohish-istaklari bor. Mahalla uyushmasi va iqtisodiy kompleks vakillari ularni aniqlab, qo‘llab-quvvatlasa, aholini band qilish, daromad manbai yaratish mumkin. Shuning uchun hamma masʼullarni quyi bo‘g‘inga tushirib, hududlarni mahallabay rivojlantirishga eʼtibor qaratyapmiz, — dedi prezident.