Туркия етакчиси Исроилнинг Ғазодаги ҳарбий амалиётларини геноцид деб атади

Туркия президенти Ражаб Тоййиб Эрдўғон Исроилнинг Ғазодаги ҳарбий кампаниясини “геноцидга уриниш” дея баҳолади. Бу ҳақда CNN нашри хабар берди.

1 март куни Анталия дипломатик форуми чоғида сўзга чиққан Туркия президенти Ражаб Тоййиб Эрдўғон Исроилга қарши бир қатор кескин баёнотлар берган. Исроилнинг тўхтамаётган ҳужуми ортида геноцид қилиш нияти борлигини билдирган.

“Ҳатто урушда ҳам амал қилиш керак бўлган ахлоқ, этикет ва қонун-қоидалар бор. Она бағридаги гўдакларни очлик ва ташналикка ҳукмига ташлаб қўйиш бу даҳшатли. Касалхоналар, черковлар, масжидлар, мактаблар, университетлар, қочқинлар лагерлари ва тез ёрдам машиналарини бомбалар нишонига айлантириш бу ваҳшийликдир,“ — деган Анқарадаги ҳукумат олий раҳбари.

Эрдоғон форумда Фаластин давлатини тузишга чақирган. Президентга кўра, мустақил давлатни тан олмасдан туриб, на Фаластиндаги зулмни тўхтатиш мумкин ва на халқаро тизимга ишончни тиклаш.