Бу фоний дунё ҳеч кимга оқибат қилмайди, одам зоти борки, кун келиб бу дунёни тарк этади. Гап инсоннинг қанча яшаганида эмас, балки умрини қандай ишларга сарфлаганида бўлса керак. Чунки одамзод узоқ умр кўриб ҳам ўзидан ҳеч нарса қолдиролмаслиги мумкин.
Таниқли клипмейкер Жасур Шаметов ҳам жуда қисқа умр кўрди. У эндигина 39 баҳорни қарши олганди. У ҳаётни севар, ижодда ҳам қилиши керак бўлган ишлари жуда кўп эди.
— Оилада учта фарзанд бўлганмиз, акам Жасур Шаметов тўнғичимиз эди. Телевидение соҳаси оиламизга бегона эмас, ота-онам ҳам 35 йилдан ортиқ шу соҳада фаолият юритган. Шу боис акам болаликдан операторлик соҳасига қизиққан. Мактабни тамомлаш арафасида дўстлари билан ўша ердаги имтиҳонларга тайёргарлик кўришган. Аммо имтиҳонларга бир ҳафта қолганида, фикридан қайтиб, санъат олийгоҳига ҳужжат топширган.
Акам ҳар доим бирор ижодий лойиҳага қўл уришдан аввал албатта ота-онам билан маслаҳатлашарди. Аммо сўнгги қарорни ўзи қабул қиларди. Унинг операторлик қарашлари ўзига хос эди. Биринчи курсни тамомлаб клипмейкер Баҳодир Йўлдошевга шогирдликка тушган. У инсон ниҳоятда талабчан, шу билан бирга шогирдларни синаб оладиган ижодкор. Операторликни ўрганаман деб келган шогирдларга съёмка майдончасидаги полни ювдириб, декорацияларни қурдириб ишнинг машаққатини тушунтирарди. Акам ҳамма синовлардан яхши ўтиб, у инсондан клипмейкерлик сир-асрорларини ўрганди.
Акам хонанда Шоҳруҳхон билан институтда бирга ўқиган. Илк клипни ҳам унинг “Ҳай ёр-ёр” қўшиғига суратга олган. Мана шу клип икки инсоннинг ижодкорлар орасида танилишига, ўз мухлисини топишига сабабчи бўлган. 2001 йиллари компьютер графикалари у қадар ривожланмаган, бу соҳа мутахассислари ниҳоятда кам даврлар бўлган. Санъаткорлар илтимос қилиб, телевидения компьютерларида монтажларини қилдирарди. Уйимизда компьютер бўлгани учун Шоҳруҳхон клип битгунича уйимизга келиб, баъзан ётиб қолиб бўлса-да, акам билан тайёрлашган, — дейди Жавлон Шаметов.
Клипмейкер Жасур Шаметов ўлимидан олдин руҳий тушкунликка тушгани ва хорижга кўчиб кетишни истагани ҳақидаги гап-сўзлар нечоғли асосли?
— Акам раҳматлидаги ҳолатни руҳий эмас, профессионал тушкунлик деган бўлардим. Замон ўзгаргани сари талаблар ҳам ўзгарди, рақобат ҳам кучайди. Клипмейкерлик соҳасида сифатни сақлаб қолган ҳол-да, иқтисодиётни ҳам эсдан чиқармаслик қийин бўлиб қолди. Соҳага энди кириб келганлар арзон ва сифатсиз маҳсулот тайёрлайди. Профессионал ижодкорлар эса қимматга баҳоланадиган сифатли маҳсулот тайёрлайди. Мобилография соҳасининг кириб келиши профессионал операторлар фаолиятига ўз таъсирини ўтказди. Акам меҳнатига яраша ҳақ тўланмаётганидан бир оз ранжиган пайтлари ҳам бўлган.
Акам “Оскар” мукофотини қўлга киритишни орзу қиларди. Инглиз тилини ўрганиб, бир марта собиқ актёр Фаррух Соипов билан Америкага бориб келганди. Виза олиб яқин кунларда АҚШга кетишни режалаштириб юрганди. Аллоҳнинг иродаси экан, бунга улгуролмади, — дейди Жавлон Шаметов.
Ижтимоий тармоқларда машҳур клипмейкернинг ўлими билан боғлиқ турли миш-мишлар тарқалди. Улар орасида ҳатто Жасур Шаметов ўз жонига қасд қилгани билан боғлиқ хабарлар ҳам бор эди. Хўш, бу миш-мишларга укаси Жавлон Шаметов қандай муносабат билдиради.
— Акамни ўлик ҳолда биринчи мен кўрдим. Жуда кўп гап-сўзлар тарқалди, менда ўлим ҳолати юзасидан экспертларнинг хулосаси ҳам бор. Аввало ҳаммаси Аллоҳнинг иродаси. Акам иккимизнинг уйимиз жуда яқин, бир ҳафта олдин онамнинг олдига келиб қон босими ошаётгани ҳақида айтиб қолди. Охирги икки кунда эса қаттиқ шамоллаганди. 9 февраль куни кечаси 20:30 да қўнғироқларга жавоб бермагач, деразадан ошиб уйга кирдим. Ўшанда акамни жонсиз ҳолатда кўриб, шокка тушдим. Экспертлар акамга пневмония ташхисини қўйди, — дейди Жавлон Шаметов.
Изоҳ (0)