Bu foniy dunyo hech kimga oqibat qilmaydi, odam zoti borki, kun kelib bu dunyoni tark etadi. Gap insonning qancha yashaganida emas, balki umrini qanday ishlarga sarflaganida bo‘lsa kerak. Chunki odamzod uzoq umr ko‘rib ham o‘zidan hech narsa qoldirolmasligi mumkin.
Taniqli klipmeyker Jasur Shametov ham juda qisqa umr ko‘rdi. U endigina 39 bahorni qarshi olgandi. U hayotni sevar, ijodda ham qilishi kerak bo‘lgan ishlari juda ko‘p edi.
— Oilada uchta farzand bo‘lganmiz, akam Jasur Shametov to‘ng‘ichimiz edi. Televideniye sohasi oilamizga begona emas, ota-onam ham 35 yildan ortiq shu sohada faoliyat yuritgan. Shu bois akam bolalikdan operatorlik sohasiga qiziqqan. Maktabni tamomlash arafasida do‘stlari bilan o‘sha yerdagi imtihonlarga tayyorgarlik ko‘rishgan. Ammo imtihonlarga bir hafta qolganida, fikridan qaytib, sanʼat oliygohiga hujjat topshirgan.
Akam har doim biror ijodiy loyihaga qo‘l urishdan avval albatta ota-onam bilan maslahatlashardi. Ammo so‘nggi qarorni o‘zi qabul qilardi. Uning operatorlik qarashlari o‘ziga xos edi. Birinchi kursni tamomlab klipmeyker Bahodir Yo‘ldoshevga shogirdlikka tushgan. U inson nihoyatda talabchan, shu bilan birga shogirdlarni sinab oladigan ijodkor. Operatorlikni o‘rganaman deb kelgan shogirdlarga syomka maydonchasidagi polni yuvdirib, dekoratsiyalarni qurdirib ishning mashaqqatini tushuntirardi. Akam hamma sinovlardan yaxshi o‘tib, u insondan klipmeykerlik sir-asrorlarini o‘rgandi.
Akam xonanda Shohruhxon bilan institutda birga o‘qigan. Ilk klipni ham uning “Hay yor-yor” qo‘shig‘iga suratga olgan. Mana shu klip ikki insonning ijodkorlar orasida tanilishiga, o‘z muxlisini topishiga sababchi bo‘lgan. 2001-yillari kompyuter grafikalari u qadar rivojlanmagan, bu soha mutaxassislari nihoyatda kam davrlar bo‘lgan. Sanʼatkorlar iltimos qilib, televideniya kompyuterlarida montajlarini qildirardi. Uyimizda kompyuter bo‘lgani uchun Shohruhxon klip bitgunicha uyimizga kelib, baʼzan yotib qolib bo‘lsa-da, akam bilan tayyorlashgan, — deydi Javlon Shametov.
Klipmeyker Jasur Shametov o‘limidan oldin ruhiy tushkunlikka tushgani va xorijga ko‘chib ketishni istagani haqidagi gap-so‘zlar nechog‘li asosli?
— Akam rahmatlidagi holatni ruhiy emas, professional tushkunlik degan bo‘lardim. Zamon o‘zgargani sari talablar ham o‘zgardi, raqobat ham kuchaydi. Klipmeykerlik sohasida sifatni saqlab qolgan hol-da, iqtisodiyotni ham esdan chiqarmaslik qiyin bo‘lib qoldi. Sohaga endi kirib kelganlar arzon va sifatsiz mahsulot tayyorlaydi. Professional ijodkorlar esa qimmatga baholanadigan sifatli mahsulot tayyorlaydi. Mobilografiya sohasining kirib kelishi professional operatorlar faoliyatiga o‘z taʼsirini o‘tkazdi. Akam mehnatiga yarasha haq to‘lanmayotganidan biroz ranjigan paytlari ham bo‘lgan.
Akam “Oskar” mukofotini qo‘lga kiritishni orzu qilardi. Ingliz tilini o‘rganib, bir marta sobiq aktyor Farrux Soipov bilan Amerikaga borib kelgandi. Viza olib yaqin kunlarda AQSHga ketishni rejalashtirib yurgandi. Allohning irodasi ekan, bunga ulgurolmadi, — deydi Javlon Shametov.
Ijtimoiy tarmoqlarda mashhur klipmeykerning o‘limi bilan bog‘liq turli mish-mishlar tarqaldi. Ular orasida hatto Jasur Shametov o‘z joniga qasd qilgani bilan bog‘liq xabarlar ham bor edi. Xo‘sh, bu mish-mishlarga ukasi Javlon Shametov qanday munosabat bildiradi.
— Akamni o‘lik holda birinchi men ko‘rdim. Juda ko‘p gap-so‘zlar tarqaldi, menda o‘lim holati yuzasidan ekspertlarning xulosasi ham bor. Avvalo hammasi Allohning irodasi. Akam ikkimizning uyimiz juda yaqin, bir hafta oldin onamning oldiga kelib qon bosimi oshayotgani haqida aytib qoldi. Oxirgi ikki kunda esa qattiq shamollagandi. 9-fevral kuni kechasi 20:30 da qo‘ng‘iroqlarga javob bermagach, derazadan oshib uyga kirdim. O‘shanda akamni jonsiz holatda ko‘rib, shokka tushdim. Ekspertlar akamga pnevmoniya tashxisini qo‘ydi, — deydi Javlon Shametov.
Izoh (0)