«Дарё»нинг YouTube’даги каналида Ўзбекистонда хизмат кўрсатган артист Равшан Намозовнинг турмуш ўртоғи билан суҳбат ташкил этилди. У турмуш ўртоғига Филипп Киркоровнинг айтган қувончли хабари ва ўлимидан бир кун аввалги воқеалар ҳақида сўзлаб берди.
— Равшан Намозовнинг халқаро танловлардаги иштироки ҳарбий хизматни ўтган вақтлари билан боғлиқ. У Россиянинг Саратов вилоятига хизматга юборилганида мусиқага қизиқадиган учта хизматдоши билан танишиб қолган. Улар фаоллар залини тозалаётганда струналари узилган эски гитара топиб олишади. Турмуш ўртоғим бу воқеаларни ўзгача ҳаяжон билан эсларди. У «Гитарага леска симларини боғлаб, қўшиқ айтаётганимни командир кўриб қолганди. Мусиқага қизиқишимизни билиб залда машғулот ўтишимизга рухсат берганди», деб сўзлаб берганди. Улар ҳарбий қисмда машҳурликка эришганидан кейин. Уларнинг СОЮЗ бўйича гастрол концертларида иштирок этишига рухсат беришган. Ҳарбий хизматни якунлагач, улар Термизга қайтиб «Беҳруз» номли ансамблни ташкил этишган.Ўша вақтларда бу ансамбл Термизда катта машҳурликка эришган. 1985 йили Москвада ўтказилган ёшлар фестивалида совринли ўринни қўлга киритган, ундан кейин Германия ва Тошкентда ўтказилган фестивалларда иштирок этишган. Тошкентдаги фестивалда «Қарс» гуруҳидаги йигитлар Равшан акага бирга ижод қилишни таклиф этишган. Улар 1989 йили «Осиё овози» кўрик танловида қатнашганида, ҳакамлар ҳайъати уч кун ғолибни аниқлаш бўйича бош қотиришган экан. Ҳатто, европалик улар тадбир ташкилотчиларига «Агар шу йигитлар ғолибликни қўлга киритишмаса, танловда ҳакам сифатида иштирок этмаймиз», деб шарт қўйишган экан. Равшан ака йўлакда кетаёца, россиялик машҳур хонанда Филипп Киркоровни учратиб қолиб, у ғалаба билан табриклаган экан, — дейди Равшан Намозовнинг турмуш ўртоғи.
Муҳаббат Намозова турмуш ўртоғининг камтарона ҳаёт кечиргани ва мол-дунёга қизиқмагани ҳақида айтиб ўтди.
— Одамлар пул йиғиб, қимматбаҳо нарса олсам ёки саёҳат қилсам дейди. Равшан ака ҳеч қачон бундай нарсаларга интилмасди. У рўзғордан ортган пулларини йиғиб, мусиқий асбоблар сотиб оларди. Унинг ёнига бир бонка сув ва тўрттагина қотирилган нон қўйса бўлди эди. У гитарасини олиб, жуда чиройли мусиқаларни чаларди. Эски машина ҳайдаб, оддий кийиниб юрса ҳам қиммат мусиқий асбоблар сотиб олганидан жаҳлим чиқарди. «Шуни ўрнига яхшироқ кийим олсангиз бўлмайдими?» деб койиб берардим. Ўлимидан аввал икки ярим ой касалхонада даволанди. «Гитарамни соғиндим», деб худди уни қучоқлагандек ётарди. Аммо кўз тегади, деб уларни касалхонага олиб келишларини истамасди, — дейди Муҳаббат Намозова.
У суҳбат давомининг турмуш ўртоғи икки ярим ойлик даволанишдан сўнг, ўлимидан бир кун аввал уйига қайтгани ҳақида гапирди.
— Турмуш ўртоғим умумий ҳисобда икки ярим ой касалхонада даволанди. Жонлантириш бўлимидан чиққанидан кейин шифокорлар унинг ёнида бўлишимни сўрашди. Узоқ вақт даволанганидан кейин 22 сентябрь куни кечаси соат иккида: «Уйга кетайлик», деб қолди. Унинг хоҳишига қарши бормай, юзимни ювгани бориб келдим. Қайтсам «Онаси, эрталаб кетақоламиз. Шифокорларга раҳматимизни айтиб кетамиз», деди. Эрталаб шифокорлар келгач, уйга кетишга рухсат олдик. Шунда ҳам муҳим қарорни ёлғиз ўзим чиқаришга қўрқиб, қайнсингилларимни чақирдим. Балки яқинларининг олдида бўлса, кўнгли кўтарилар деб умид қилгандик. Икки ярим ой касалхонада даволанган бўлса бирор марта уйга кетишни сўрамаганди. Энди нега уйга келишни сўраганини тушуняпман. У уйини, оиласини ва гитараларининг бағрида жони узилишини истаган экан. 23 сентябрь куни тунги соат 1:30 да жони узилди, — дейди Муҳаббат Намозова.
Мавзуга доир:
Изоҳ (0)