Кремль “Йигит сўзи” (“Слово пацана”), “Холоп-2”, “Муз-3” ва бошқа машҳур фильмлар ва сериаллардан Россия президенти Владимир Путиннинг сайловолди кампанияси мақсадида фойдаланган. “Важние Истории” ва Meduza нашрлари Россия президенти аппаратининг сиздирилган ҳужжатларини ўрганди.
2023 йил баҳорида Россия президенти администрациясида (AП) Путиннинг навбатдаги қайта сайланиши бўйича йиғилиш бўлиб ўтган. Иштирокчиларга “Сайлов учун ижодий контент” мавзусидаги тақдимот намойиш этилган. Тақдимотга кўра, 2024 йилги сайловлар учун бир неча ўнлаб “ижодий лойиҳалар” тайёрланган. Улар орасида “махсус ҳарбий операция” лойиҳалари (яъни уруш ҳақида) ва жуда машҳур фильм ҳамда сериаллар мавжуд. Шу жумладан:
- “Холоп-2” комедияси
- “Бремен мусиқачилари” мусиқий фильми
- “Payк буйруғида” эртак-фильми
- “Йигит сўзи” сериали бор.
Президент аппаратидаги тақдимот муаллифлари бу ва бошқа лойиҳалар “миллий манфаатларни ҳимоя қилиш”ни таъминлаш, “Россиядаги одамлар ҳаётидаги ижобий ўзгаришлар, ватандошларнинг тарихий ва замонавий ютуқлари, кун қаҳрамонлари тўғрисида билим даражасини ошириш”, шунингдек, “маданий ўзига хослик, анъаналар ва суверенитетни сақлашга” мўлжалланганини айтган.
Кремлга кўра, “Йигит сўзи” “Россиядаги ҳаёт сифати ўзгаришлари” ҳақида гапиради (яъни, 2020 йилларда руслар 1980 йиллардаги совет халқига қараганда яхшироқ яшайди). Сериални суратга олишга Интернетни ривожлантириш институти пул ажратган.
Бу маълумотлар ҳақиқийлигини Кремлга яқин ва ушбу ҳужжат билан таниш бўлган суҳбатдош, шунингдек, президент аппаратидаги учрашув иштирокчиларидан бири тасдиқлайди.
Изоҳ (0)