Украина президенти Владимир Зеленский ўзини ёмон ота деб билишини айтди. Унинг сўзларига кўра, ҳозир фарзандларини рафиқаси — биринчи хоним Елена Зеленская ва уруш тарбияламоқда.
Бу ҳақда президент скандинавия журналистларига берган интервьюсида маълум қилди, деб ёзади Yle. Зеленский уруш унинг руҳий ҳолатига сезиларли даражада таъсир қилаётганини, лекин у шунчаки дам ололмаслигини айтди.
“Барча фожиаларни бошимдан ўтказяпман. Урушга ўрганиб қолганмиз, дейишга ҳаққим йўқ”, — дейди Украина раҳбари.
Зеленский ва рафиқаси Еленанинг икки фарзанди бор. Украина президент уруш олиб бораётган мамлакатни бошқариш билан бир вақтда оталик вазифаларини адо этиш имконсиз эканини тан олди.
“Одамлар мени ёмон президент эмас, дейишади, лекин мен ҳозирда аниқ яхши ота эмасман. Фарзандларимни рафиқам ва уруш тарбияламоқда”, — дейди у.
Шунга қарамай, Украина президенти оптимистлигича қолаётганини айтди. Унинг қўшимча қилишича, Украинага тегишли биринчи ҳудуднинг озод этилиши унинг учун “янги ҳаёт таъми” бўлган.
Кенг миқёсли уруш пайтида Зеленский камдан кам ҳолларда оиласи ҳақида омма олдида гапиради. Урушнинг бир йиллиги муносабати билан сўзлаган нутқида президент рафиқаси ва болалари уруш пайтида Украинада қолишга қарор қилганини айтганди.
“Мен уларни яхши кўраман. Рафиқам, фарзандларим мен учун асосий одамлар. Уларни тез-тез кўраман. Ота-онамни эса умуман кўриш имкони йўқ”, — деган у.
Украина раҳбари фарзандлари ва мамлакат учун ҳамма нарсага тайёр рафиқаси билан фахрланишини қўшимча қилган.
Изоҳ (0)