“Эвертон”нинг собиқ ўйинчиси бир умрга қамалди

Февраль ойида футболчиларнинг қамалгани ёки қидирувга берилгани ҳақида маълумотлар кўпайди. Масалан “Барселона” собиқ футболчиси 4,5 йилга қамалган бўлса, яна бир футболчи Квинс Промес қидирувга берилган. Суд томонидан энг оғир жазони “Эвертон” клубининг собиқ ўйинчиси Ли Те олди. У Хитой суди томонидан бир умрлик қамоқ жазосига ҳукм қилинди.

2022 йилнинг ноябрида Хитой Халқ Республикаси ташаббуси билан ўтказилган коррупцияга қарши текширувда Ли Те асосий айбдорлардан бири сифатида қўлга олинди.  

У энг катта “иш”ни 2018 йилда амалга оширган. Ўшанда Ли Хитой терма жамоаси мураббийи сифатида фаолият олиб бориш учун 3 миллион юан (тахминан 422 минг доллар) берган. Шундан кейин у 2020 йил январида Марчелло Липпи бўшатилгач, бош мураббий сифатида тайинланган. 2021 йилнинг кузида жамоаси билан Жаҳон Чемпионати саралашида омадсиз қатнашгани учун ишдан бўшатилган.

Бундан ташқари, собиқ футболчи Хитой чемпионати иккинчи дивизионида келишилган ўйинларни ташкил қилганини тан олган. Мураббий ўз жамоасини суперлигага олиб чиқиш учун рақиблар билан келишган.

“Мен бундан жуда афсусдаман, мен тўғри йўлни танлашим керак эди, аммо ўша пайтда баъзи нарсалар футболдаги одатий ҳолатдек қаралар эди”, — дейди бош мураббий.

У бу ишларни Hebei China Fortune ва Wuhan Zall жамоаларида амалга оширган. Ҳаттоки, бу қинғир ишлари билан Хитой Лига1 мусобақасида чемпион ҳам бўлган.

23 февралда Ли Те бир умрлик қамоқ жазосига ҳукм қилингани маълум бўлди. Хитой Футбол Федерациясининг собиқ раҳбари 15 йиллик қамоқ жазосига ҳукм қилинди.

Ли Англиянинг “Эвертон” жамоасига ҳомийлар орқали борган. Ёш футболчи Хитойнинг энг истеъдодли футболчиларидан бири бўлган. Унинг ижара пули ва маоши “Эвертон”нинг ўша пайтдаги ҳамкори Хитой Telekomмуникация компанияси томонидан тўланган.

Девид Моес кўплаб танқидларга қарамай уни бош таркибда ўйнатишга ҳаракат қилган. Ярим ҳимоячи умумий 33 ўйинда майдонга тушган ва “Эвертон” мавсумни 7-ўринда якунлаган, 2003 йилнинг августига келиб Англия жамоаси хитойлик футболчини 1,2 миллион доллар эвазига харид қилди.

Ундан кейинги мавсумнинг биринчи учрашувида қизил карточка олган Ли мавсумнинг ўртасида келиб бир неча бор жароҳат олди. 2004 йил Хитой терма жамоаси сафида ўйнаб оёғини синдирди. Шундан сўнг, у “Эвертон”нинг асосий таркибига кира олмади.

2006 йилга келиб Ли “Шеффилд” жамоасига ўтди, аммо яна ўша жароҳатлар сабаб фақат бир ўйинда иштирок этди. Кейинчалик футболчи Хитой жамоаларида ўйнади.