Fevral oyida futbolchilarning qamalgani yoki qidiruvga berilgani haqida ma’lumotlar ko‘paydi. Masalan “Barselona” sobiq futbolchisi 4,5 yilga qamalgan bo‘lsa, yana bir futbolchi Kvins Promes qidiruvga berilgan. Sud tomonidan eng og‘ir jazoni “Everton” klubining sobiq o‘yinchisi Li Te oldi. U Xitoy sudi tomonidan bir umrlik qamoq jazosiga hukm qilindi.
2022-yilning noyabrida Xitoy Xalq Respublikasi tashabbusi bilan o‘tkazilgan korrupsiyaga qarshi tekshiruvda Li Te asosiy aybdorlardan biri sifatida qo‘lga olindi.
U eng katta “ish”ni 2018-yilda amalga oshirgan. O‘shanda Li Xitoy terma jamoasi murabbiyi sifatida faoliyat olib borish uchun 3 million yuan (taxminan 422 ming dollar) bergan. Shundan keyin u 2020-yil yanvarida Marchello Lippi bo‘shatilgach, bosh murabbiy sifatida tayinlangan. 2021-yilning kuzida jamoasi bilan Jahon Chempionati saralashida omadsiz qatnashgani uchun ishdan bo‘shatilgan.
Bundan tashqari, sobiq futbolchi Xitoy chempionati ikkinchi divizionida kelishilgan o‘yinlarni tashkil qilganini tan olgan. Murabbiy o‘z jamoasini superligaga olib chiqish uchun raqiblar bilan kelishgan.
“Men bundan juda afsusdaman, men to‘g‘ri yo‘lni tanlashim kerak edi, ammo o‘sha paytda ba’zi narsalar futboldagi odatiy holatdek qaralar edi”, — deydi bosh murabbiy.
U bu ishlarni Hebei China Fortune va Wuhan Zall jamoalarida amalga oshirgan. Hattoki, bu qing‘ir ishlari bilan Xitoy Liga1 musobaqasida chempion ham bo‘lgan.
23-fevralda Li Te bir umrlik qamoq jazosiga hukm qilingani ma’lum bo‘ldi. Xitoy Futbol Federatsiyasining sobiq rahbari 15 yillik qamoq jazosiga hukm qilindi.
Li Angliyaning “Everton” jamoasiga homiylar orqali borgan. Yosh futbolchi Xitoyning eng iste’dodli futbolchilaridan biri bo‘lgan. Uning ijara puli va maoshi “Everton”ning o‘sha paytdagi hamkori Xitoy Telekommunikatsiya kompaniyasi tomonidan to‘langan.
Devid Moyes ko‘plab tanqidlarga qaramay uni bosh tarkibda o‘ynatishga harakat qilgan. Yarim himoyachi umumiy 33 o‘yinda maydonga tushgan va “Everton” mavsumni 7-o‘rinda yakunlagan, 2003-yilning avgustiga kelib Angliya jamoasi xitoylik futbolchini 1,2 million dollar evaziga xarid qildi.
Undan keyingi mavsumning birinchi uchrashuvida qizil kartochka olgan Li mavsumning o‘rtasida kelib bir necha bor jarohat oldi. 2004-yil Xitoy terma jamoasi safida o‘ynab oyog‘ini sindirdi. Shundan so‘ng, u “Everton”ning asosiy tarkibiga kira olmadi.
2006-yilga kelib Li “Sheffild” jamoasiga o‘tdi, ammo yana o‘sha jarohatlar sabab faqat bir o‘yinda ishtirok etdi. Keyinchalik futbolchi Xitoy jamoalarida o‘ynadi.
Izoh (0)