Самарқанд вилояти, Ургут тумани, Бешкапа маҳалласидаги 47-умумтаълим мактабида 11-синф ўқувчиларининг сочини мактаб директори ўринбосари Ш.О. мажбурлаб олдирганлиги ҳақида хабар берилганди. Мазкур ҳолат юзасидан «Дарё» мухбири Фарҳод Норбўтаев суриштирув олиб борди.
Ўрганиш жараёнида маълум бўлишича, 27 сентябрь куни учинчи дарси вақтида Ш.О. ўқувчилар одоб-ахлоқ қоидаларига риоя қилаётганликларини ўрганиш мақсадида 11-синф хонасига кирган.
Директор ўринбосари ўқув йилининг бошида ушбу синф ўқувчилари билан учрашиб, тартиб-интизомга риоя этмаган, сочи ўсиб кетган ва тозаликка амал қилмаган ўқувчиларни огоҳлантириб, уларга ўзларини тартибга солиб олиши учун икки ҳафта муҳлат берган. Бироқ шундай бўлса-да, воқеа содир бўлган кунга қадар мактабнинг 11-синф ўқувчиси О.Х. сочини олдирмаган.
Мавзуга доир: Ургутлик ўқувчининг сочини мажбурлаб олган ва унга жароҳат етказган мактаб директори ўринбосарига интизомий чора кўрилди
«Ўқитувчи мени бир неча бор огоҳлантиришига қарамасдан, сочимни олдирмадим. Шу сабабли ҳам у киши сочимни озгина кесиб қўйди. Шундан сўнг сартарошхонага бориб, сочимни олдириш жараёнида улардан суратга олиб қўйишини айтдим. Сочимнинг ҳолатини жаҳл устида ижтимоий тармоқларга тарқатиб юбордим. Тўғриси, ижтимоий тармоқларда тарқаган суратлар сабаб бундай ҳолат юзага келишини кутмагандим. Менинг ҳеч кимга эътирозим йўқ. Ўқитувчиларимни ҳурмат қиламан. Уларнинг касб байрами олдидан бундай ҳолга солиб қўйганим учун ўзим хижолатдаман. Бунинг учун улардан узр сўрайман», — дейди 11-синф ўқувчиси О.Х.
Мактаб директори ўринбосари Ш.О. билан бўлиб ўтган суҳбат жараёнида ҳақиқатда ўқув йили бошланиши билан ўқувчиларнинг ўзини тутиши, кийиниши, одоб-ахлоқига эътибор қаратганини билдирган. Хусусан, директор ўринбосари ва 11-«А» синф ўқувчилари ўртасида бўлиб ўтган суҳбат жараёнида белгиланган муддат ичида ўқувчилар сочини талаб бўйича олдирмаса, ўзи олиб ташлашини айтган. Ўқувчилар бунга рози бўлган.
«Мен ўқувчилар тозаликка риоя қилишини истайман. Ҳар бир ўқувчи мактабга мос равишда кийиниши лозим. Бу ҳол бўлишидан аввал ҳамма ўқувчилар билан гаплашиб уларни огоҳлантирганман. Ўқувчилар ўзлари бунга рози бўлишган», — дейди директор ўринбосари Ш.О.
11-«А» синф ўқувчилари билан бўлиб ўтган суҳбат жараёнида улар ҳам О.Х.нинг сочи ўсганлиги учун фақат унинг сочи олинганлигини таъкидлади. Ўқитувчи бошқа ҳеч қайси ўқувчининг сочини олмаганлигини билдирди. Қолаверса, ўқитувчи ўқувчига нисбатан ҳеч қандай ваҳшийлик қилмаган. Бор-йўғи сочи икки жойидан олинган, холос. Ижтимоий тармоқлар ҳолатни бўрттириб талқин қилинган.
«Айрим сайтларда ҳолатни бости-бости қилиш учун ҳаракат қилганлигим тўғрисида турли гап-сўзлар тарқалди. Бироқ тарқалган хабарлар ҳеч қандай асосга эга эмас. Боиси вилоят Халқ таълими бошқармаси ишчи гуруҳи таркибида журналистлар ҳам бўлиб, мазкур ҳолат бевосита уларнинг иштирокида ўрганиб чиқилди. Бевосита ишчи гуруҳи иштирокида мактаб ўқитувчилари билан йиғилиш ўтказдик. Йиғилишда юқорида қайд этилган ҳолат атрофлича муҳокама қилинди. Қолаверса, менга воқеа юзасидан расмий изоҳ олиш учун ҳеч қайси журналист қўнғироқ қилмаган», — дейди Ургут туман халқ таълими бўлими мудири Ғайрат Абдиев.
Айрим интернет нашрларида ваҳшийликда айбланган ўқитувчи ишдан олинганлиги тўғрисида хабар тарқалди. Бироқ суриштирувимиз давомида ушбу ҳолат ўқувчини тартибга солиш, мактаб қоидаларига риоя қилиш мақсадида амалга оширилганлиги аниқланди. Самарқанд вилоят Халқ таълими бошқармаси томонидан мазкур ҳолат бошқа такрорланмаслиги учун ўқитувчига огоҳлантириш берилган.
Изоҳ (0)