Bolalar ombudsmani Navoiyda maktab o‘quvchilari dars payti sport zalga yig‘ilib, sochi olingani aytilgan xabarlarga munosabat bildirdi.
“Kun.uz”ning yozishicha, Navoiy shahridagi 2-umumta’lim maktabida o‘g‘il bola o‘quvchilarning ommaviy ravishda sochini olish “tadbiri” o‘tkazilgan. Manbaga ko‘ra, maktab direktori tashabbusi bilan maktabga sartarosh chaqirilgan hamda turli sinflardan o‘g‘il bola o‘quvchilar sport zalga yig‘ilib, sochi olingan. Jarayonni Milliy gvardiya xodimlari ham kuzatib turgan.
Qayd etilishicha, holat Bolalar ombudsmani tomonidan o‘rganilmoqda.
“Maktab maʼmuriyati tomonidan bunday harakatlarga mutlaqo yo‘l qo‘yib bo‘lmaydi. Birinchi navbatda, bu umumiy o‘rta taʼlim muassasalarining odob-axloq qoidalariga zid. Muhimi esa bu bolaning Konstitutsiyada kafolatlangan shaxsiy daxlsizlik huquqi hamda uning shaʼni va qadr-qimmati hurmat qilinishi huquqiga tahdid soladi. Mazkur harakatga yo‘l qo‘ygan masʼullarga nisbatan tegishli chora ko‘rilishi zarur”, — deb taʼkidlaydi Bolalar ombudsmani.
Hozirda bu kabi nomaqbul holatlarning boshqa taʼlim muassasalarida ham yuzaga kelmasligi bo‘yicha choralar ko‘rilmoqda.
Eslatib o‘tamiz, 2022-yil sentyabrda Toshkent shahar Mirzo Ulug‘bek tumanida joylashgan 142-sonli maktabda ichki ishlar organlari xodimlari, maktab ma’muriyati hamda o‘quvchilar o‘rtasida o‘tkazilayotgan profilaktik suhbat jarayoni aks etgan video va fotosurat tarqalib, keng muhokamalarga sabab bo‘lgandi.
Izoh (0)