Япония Украина иқтисодиётини қўллаб-қувватлаш учун 150 миллион долларгача маблағ ажратади

Бу ҳақда Украина бош вазирининг биринчи ўринбосари — иқтисодиёт вазири Юлия Свириденко ижтимоий тармоқларда маълум қилди.

“Украина ва Япония ўртасидаги ҳамкорлик янада кучаймоқда. Токиода бўлиб ўтган Иқтисодий ривожланиш конференцияси давомида шериклигимизни мустаҳкамлаш ва Украинани қайта тиклаш учун юзлаб миллион АҚШ долларини жалб қилиш бўйича 56 та ҳужжат имзоланди. JBIC Украина хусусий секторини қўллаб-қувватлаш учун 150 миллион доллар кредит беради”, — деди у.

Маблағлар аллақачон тасдиқланган лойиҳаларга сарфланади.

JBIC тақдим қилган маблағ Украинада қишлоқ хўжалиги, қайта ишлаш саноати, транспорт ва логистика, рақамли инфратузилма ва тиббиёт соҳасини ривожлантиришга ёрдам беради. Хусусан, қайта тикланадиган энергия манбалари лойиҳалари алоҳида аҳамият касб этади, деди Иқтисодиёт вазирлиги раҳбари.

Бундан ташқари, Свириденконинг сўзларига кўра, Nippon экспорт ва инвестицияларни суғурталаш (NEXI) агентлиги Украина учун 1,25 миллиард евролик сармоя ва савдо рискларини қоплаш бўйича янги дастурни ишга туширган. У икки қисмдан иборат бўлади: 937,5 миллион евро япон компаниялари сармояларини суғурталаш учун (5 йил муддатга) ва 312,5 миллион евро япон товарлари ва хизматлари экспорти учун кредит (2 йил муддатга).

Бундан ташқари, Япония халқаро ҳамкорлик агентлиги (JICA) Украинанинг Horizon Capital хусусий инвестиция фондига қарийб 20 миллион доллар ажратиши кутилмоқда.