Toshkent shahar Chilonzor tumanida noqonuniy qurilgan ko‘p qavatli binoni buzish ishlari boshlandi, deb xabar beradi poytaxt hokimligi matbuot xizmati.
Qayd etilishicha, Majburiy ijro byurosi Chilonzor tumani bo‘limiga sud ijro varaqasi kelib tushgan. Unda Chilonzor tumani Do‘mbirobod 2-tor ko‘cha 10-uyda qurilayotgan noqonuniy qurilmani fuqaro I.M. hisobidan buzish belgilangan. Biroq fuqaro ogohlantirishlar, ma’muriy jarimalarga qaramay, sud qarori ijrosini ta’minlamagan.
Aniqlanishicha, fuqaro xususiy uy o‘rniga ko‘p qavatli bino qurgan. Qurilish ishlari belgilangan meʼyorlarni qo‘pol ravishda buzgan holda olib borilgan. Mahalliy aholi 2019-yildan beri holat bo‘yicha chora ko‘rilishini so‘rab turli idoralarga murojaat qilgan. Qurilayotgan bino atrofdagi uy-joylarga quyosh tushishi, shamol aylanishiga xalaqit bermoqda.
“Boshida bizdan ikki qavatli turar joyi bo‘ladi deb ruxsat olgan. Lekin hozirda ular 4-5 qavatli dom qurgan”, — deydi fuqarolardan biri.
Natijada sud noqonuniy qurilgan binoni buzish to‘g‘risida qaror chiqargan. 20-fevraldan noqonuniy qurilgan binoni buzish ishlari boshlangan.
Izoh (0)