Андижон вилояти Олтинкўл туманида 21 ёшли келиннинг ўз жонига қасд қилгани тўғрисида хабарлар тарқалди. Вилоят судларининг хабар беришича, ҳолат юзасидан ўтказилаётган суд якунланди.
Унга кўра, жиноят ишлари бўйича Олтинкўл тумани судига Жиноят кодекси 109-моддаси 2-қисми (қасддан баданга енгил шикаст етказиш) ва 103-моддаси (ўзини ўзи ўлдириш даражасига етказиш) 2-қисми “а” банди билан судланувчи (марҳуманинг эри) О.Н.га оид иш келиб тушган. Дастлабки суд мажлиси 2023 йил 26 декабрь куни бошланган.
Жабрланувчининг қонуний вакили мазкур жиноят ишини блогерлар томонидан ёритиб борилишини сўраб судга илтимоснома киритган. Бироқ судланувчи ва унинг ҳимоячилари суд муҳокамасини оммавий ахборот воситалари ҳамда ижтимоий тармоқда ёритилишига қаршилик билдирганлиги боис суд томонидан ишни блогерлар иштирокисиз умумий асосларда давом эттириш юзасидан ажрим қилинган.
Суднинг 2024 йил 20 февралдаги ҳукмига кўра, О.Н. юқорида келтирилган моддалар билан айбли деб топилиб, унга узил-кесил 9 йил 3 ой муддатга озодликдан маҳрум қилиш жазоси тайинланган.
Изоҳ (0)