Европа Россия билан урушаётган Украинани ҳар томонлама қўллаб-қувватлаётганига қарамай, европаликларнинг атиги 10 фоизи бу мамлакат Россияни мағлуб этишига ишонмоқда. Бу ҳақда Британиянинг The Guardian газетаси сўровнома натижаларига таяниб хабар қилди.
Нашрнинг ёзишича, сўровномада қатнашганларнинг аксарияти икки томон “муросага келиш”ига ишонч билдирмоқда.
Сўров Европа Иттифоқига аъзо 12 давлатда, жумладан, Франция, Германия, Венгрия, Италия, Нидерландия, Польша, Испания ва Швецияда ўтказилди. Натижалар Украинанинг қарши ҳужумида боши берк кўчага кириб қолганини, шунингдек, АҚШ сиёсатидаги ўзгаришлар уруш натижаларига нисбатан пессимизмни уйғотгани, хусусан, Дональд Трампнинг иккинчи муддатга сайланиши эҳтимолидан хавотирлар кучайганини кўрсатди.
Сўровда қатнашган ҳар 10 европаликдан фақат биттаси Украина жанг майдонида ғалаба қозонишига ишонган, 20 фоиз аҳоли эса Россия ғалаба қозонади, деб ҳисоблайди.
Польша, Швеция ва Португалия аҳолисининг ҳар бешинчидан биттаси (17%) Киев ғалаба қозонишига ишонч билдирган.
Сўров натижаларига кўра, барча мамлакатлар бўйлаб респондентларнинг ўртача 37 фоизи уруш муроса билан якунланади, деган фикрда.
Изоҳ (0)