Исроил кучлари 5 февраль куни Ғазо марказида Бирлашган Миллатлар Ташкилотининг оч аҳоли учун озиқ-овқат олиб кетаётган карвонига ҳужум қилган. БМТ таҳлили ва сунъий йўлдошдан олинган тасвирлар буни тасдиқлади. Бу ҳақда CNN нашри хабар берди.
CNN нашри БМТ ва Исроил ҳарбийлари ўртасидаги ёзишмаларни топишга муваффақ бўлган. Ёзишмаларга кўра, ёрдам карвони жўнатилишидан олдин Исроил армияси ва БМТ вакиллари ўртасида юк машиналари олиб ўтилувчи йўлак келишиб олинган. Бироқ юк машиналари Исроил ўтказиш постига келиб, тўхтаб турганда уларга ҳужум қилинган.
Хабарга кўра, ҳужумда деярли ҳеч ким жабрланмаган. Аҳоли учун зарур бўлган биринчи истеъмол маҳсулотлари эса йўқ қилинган.
Исроил мудофаа кучлари ҳужум бўйича CNN сўровларига жавоб бермаган. Ҳарбийлар 5 февралдаги ҳужум тафсилотлари ўрганилаётганини билдирган.
5 февралдаги ёрдам карвонидан сўнг Ғазо шимолига бошқа гуманитар ёрдам киритилмади. Бунга асосий сабаб сифатида юклар ўтказилишига қаршилик қилувчи кучлар мавжудлиги ҳамда озиқ-овқатга муҳтож оломон ичида жамоат тартибининг йўқолгани кўрсатилган.
Изоҳ (0)