Shavkat Mirziyoyev va Belarus prezidenti Aleksandr Lukashenko muzokaralardan so‘ng ommaviy axborot vositalari vakillari uchun bayonot berdi. Bu haqda prezident matbuot xizmati xabar berdi.
Tashrif arafasida o‘tkazilgan Hukumatlararo komissiyaning navbatdagi yig‘ilishi, Hududlararo forum va Ishbilarmonlar kengashi yig‘ilishi natijalari mamnuniyat bilan qayd etildi. Bungacha yetakchi oliygohlar rektorlari va tibbiyot muassasalari rahbarlarining uchrashuvlari bo‘lib o‘tgan edi.
O‘zbekiston prezidenti jurnalistlar eʼtiborini keyingi yillarda O‘zbekiston-Belarus hamkorligida ro‘y bergan sifatli o‘zgarishlarga qaratdi. Barcha darajalardagi muloqotlar faollashgani, tovar ayirboshlash hajmi, kooperatsiya loyihalari soni oshgani, madaniy-gumanitar almashinuv va to‘g‘ridan to‘g‘ri aviaqatnovlar qayta tiklangani qayd etildi.
Yetakchilar muzokaralar atroflicha bo‘lgani, O‘zbekiston-Belarus munosabatlarining keng doirasi batafsil muhokama qilingani, ko‘p qirrali sheriklikni rivojlantirishning ustuvor yo‘nalishlari, maqsad va vazifalari belgilab olinganini maʼlum qildi.
Mintaqaviy va xalqaro tashkilotlar – Birlashgan Millatlar Tashkiloti, MDH, SHHT doirasidagi muloqotni mustahkamlashga tomonlarning intilishi qatʼiy ekani taʼkidlandi.
Tovar ayirboshlashni ko‘paytirish masalalariga alohida eʼtibor qaratildi. Yetakchilar uning hajmini yaqin yillarda 1 milliard dollardan ziyodga yetkazish vazifasini qo‘ydi.
Shu maqsadda qo‘shma tashqi savdo kompaniyasini tashkil etish va savdoni qo‘llab-quvvatlash mexanizmlarini joriy qilishga kelishib olindi.
Sanoat kooperatsiyasining ustuvor sohalari belgilab olindi. Bular – agrosanoat majmui, elektrotexnika va to‘qimachilik tarmoqlari, sog‘liqni saqlash va farmatsevtika, shaharsozlik va kommunal xo‘jaligi.
Hududlararo aloqalar salohiyati va imkoniyatlarini samarali ishga solishga alohida eʼtibor qaratildi. Madaniyat va sanʼat, oliy va professional taʼlim, turizm, yoshlar va sport sohalaridagi faol almashinuvlar davom ettiriladi. Sog‘liqni saqlash borasidagi hamkorlikning aniq yo‘nalishlari belgilab olindi.
Tomonlar navbatdagi tibbiyot, taʼlim va turizm forumlarini tashkil etishga kelishib oldi. Erishilgan kelishuvlar va imzolangan hujjatlar O‘zbekiston bilan Belarus o‘rtasidagi do‘stlik munosabatlarini mustahkamlashga xizmat qilishi, ko‘p qirrali sheriklikni aniq amaliy mazmun bilan boyitishiga ishonch bildirildi.
Izoh (0)