Беларусь президенти Александр Лукашенко “Президент тўғрисида”ги қонунга ўзгартиришларни имзолади, деб хабар берди давлат раҳбари матбуот хизмати. Ўзгартиришлар, хусусан, нафақага чиққан президент ва унинг оила аъзоларига дахлсизлик, умрбод ҳимоя ва давлат кўчмас мулкига бўлган ҳуқуқни кафолатлайди. Қонун лойиҳасининг матни ҳозир Беларуснинг қонуний Интернет-порталида эмас, лекин веб-архивда сақланиб қолган.
Ўзгартирилган қонунда президентлик лавозимини тарк этган шахс Бутун Беларусь Халқ ассамблеяси делегати ва Республика кенгашининг умрбод аъзоси бўлиб қолиши назарда тутилади. Собиқ президент ва унинг оила аъзоларига унинг бошқаруви даврида содир этилган ҳар қандай жиноятлар учун дахлсизлик берилади.
Қонунда айтилишича, президент истеъфога чиққанидан кейин давлат кўчмас мулки, жумладан, капитал бинолари жойлашган участка совға қилинади. Бундан ташқари, ўзгартиришларда сайловга қадар камида 20 йил республика ҳудудида яшаган ва чет эл пропискасига эга бўлмаган 40 ёшдан юқори фуқарогина президент бўлиши мумкинлиги белгилаб қўйилди.
Александр Лукашенконинг матбуот хизмати аниқлик киритишича, президент тўғрисидаги қонунни “ҳар томонлама тузатиш” 2022 йилда республика конституциясига ўзгартиришлар киритиш орқали кўзда тутилган. Ушбу тузатишлар президентлик бошқарувини икки муддат билан чеклайди, шунингдек, Бутун Беларусь халқ ассамблеясини ҳокимият тизимида бирлаштиради.
Изоҳ (0)