БМТ Ғазода ўт очишни тўхтатиш учун Хавфсизлик кенгашида яна овоз беришни йўлга қўймоқчи. Бироқ АҚШ унга вето қўйиш ниятида. Бу ҳақда CNN хабар берди.
БМТ Хавфсизлик кенгаши Ғазода ўт очишни тўхтатиш резолюциясини овозга қўймоқчи. Ҳужжат Жазоир томонидан тайёрланган бўлиб, ташкилотнинг 15 аъзосини Исроил ва ҲАМАС ўртасидаги урушда зудлик билан гуманитар ўт очишни тўхтатишни талаб қилишга чақирган.
АҚШнинг БМТдаги элчиси Линда Томас-Гринфилд, агар Жазоир таклиф қилган резолюция лойиҳаси овоз беришга қўйилса, у Вашингтон томонидан қабул қилинмаслигидан огоҳлантирди. Элчи АҚШ Исроил ва ҲАМАС ўртасида гаровга олинганларни озод қилиш ва ҳарбий ҳаракатларни камида олти ҳафтага тўхтатишга олиб келадиган келишув устида ишлаётганини айтди.
Вашингтонга кўра, ҲАМАС ва Исроил ўртасидаги келишув муаммони ҳал қилишнинг энг яхши йўлидир. Элчи бу “барча гаровга олинганларни оилалари билан бирлаштириш ва жанговар ҳаракатларда узоқ вақт паузани таъминлаш” имконини беришини айтди. Бундай пауза фаластинликларга озиқ-овқат, сув, ёнилғи, дори-дармон ва бошқа асосий эҳтиёжларни етказиб бериш учун зарур.
АҚШнинг БМТдаги элчисининг таъкидлашича, “бошқа томонлар бу жараённи хавф остига қўядиган чораларни ва ҳарбий ҳаракатларни якуний ҳал қилиш имкониятини илгари сурмаслиги керак”.
Ўз навбатида, БМТдаги араб давлатлари Жазоирнинг Ғазода зудлик билан ўт очишни тўхтатиш ва Исроилдан Рафаҳда тўсиқсиз гуманитар ёрдам кўрсатишини талаб қилувчи резолюция лойиҳасини қўллаб-қувватлашини яна бир бор тасдиқлади.
Изоҳ (0)