Самарқанд туман Фавқулодда вазиятлар бўлими кичик инспектори пора билан қўлга тушди, деб хабар беради Самарқанд вилояти ҳокимлиги матбуот хизмати.
ДХХ Самарқанд вилояти бошқармаси ҳамда Бош прокуратура ҳузуридаги департаментнинг вилоят бошқармаси ходимлари ҳамкорлигида тезкор тадбир ўтказилган.
Маълум бўлишича, Самарқанд тумани Фавқулодда вазиятлар бўлими Аҳоли ва ҳудудларни муҳофаза қилиш бўйича кичик инспектори Ш.Ж хизмат мавқейидан фойдаланиб, ваколатига кирмаса-да, Фавқулодда вазиятлар туман бўлими йўриқчи-қутқарувчиси ҳамда Профилактика ва назорат бўлинмаси кичик инспектори билан биргаликда Самарқанд тумани “Қайнама” МФЙ ҳудудида жойлашган “О.П.” ва “Р.К. 777” масъулияти чекланган жамиятларида ёнғин хавфсизлиги юзасидан текшириш ўтказган.
Текшириш якунида “О.П” масъулияти чекланган жамияти раҳбари Л.Р.нинг ўзи ва опаси К.Р.га тегишли “Р.К. 777” МЧЖларда ёнғин хавфсизлиги талаблари бўйича бир қатор камчиликлар аниқланганини важ қилиб, ушбу камчиликларни текшириш далолатномасига қайд этмаслиги ва уларни маъмурий жавобгарликка тортмаслиги учун 600 доллар миқдоридаги пул маблағини беришни талаб қилган.
Ҳуқуқни муҳофаза қилувчи орган ходимлари томонидан ўтказилган тезкор тадбир давомида фуқаро Ш.Ж. талаб қилинган пулларни фирибгарлик йўли билан олган вақтида ашёвий далиллар билан ушланган.
Ҳолат юзасидан Жиноят кодексининг тегишли моддалари билан жиноят иши қўзғатилиб, қонуний чора кўрилиши белгиланган.
Аввалроқ Наманганда ДХМ ходими минг доллар пора билан ушлангани тўғрисида хабар берилганди.
Изоҳ (0)