“Ўзгидромет” сайтидаги фактик об-ҳаво бўлимида маълум қилинишича, бугун (20 февраль) соат 8:00 ҳолатига бутун республикада ҳарорат 0 даражадан паст.
Сайтда кўринишича, ҳарорат фақатгина Гулистон шаҳрида 0 даража совуқни ташкил қилмоқда. Қолган ҳудудлар бундан совуқроқ.
Энг паст ҳарорат Нукус шаҳрида – 13,2 даража совуқ. Шу билан бирга, Урганч шаҳрида -11,4 даража совуқ бўлаётганини кўриш мумкин.
Навоий (-8 даража), Самарқанд (-6,1 даража), Тошкент (-5,6 даража) шаҳарларида ҳам ҳаво ҳарорати бошқа ҳудудларга нисбатан совуқроқ.
Сайт маълумотларига қараганда, Термиз, Қарши, Самарқанд, Жиззах, Гулистон, Тошкент, Нурафшон, Наманган, Фарғона, Андижон шаҳарларида бир вақтнинг ўзида (соат 08:00 ҳолатига) қор ёғмоқда.
“Ўзгидромет”нинг сўнгги прогнозларига кўра, ўтган ҳафта охирида Ўзбекистон ҳудудига кириб келган совуқ ҳаво массаси ўз таъсирини сақлаб туради.
Жорий ҳафта давомида ҳаво ҳарорати асосан кечалари 3–8 даража совуқ, шимолда 7–12 даража совуқ, баъзи жойларда 16 даража совуққача, 21–23 февралда кундуз кунлари 0–5 даража илиқ атрофида бўлади.
“21—23 февраль кунлари асосан ёғингарчиликсиз об-ҳаво бўлиши кутилмоқда. Республика бўйича баъзи жойларга туман тушади. Шамол шимоли–шарқдан 7–12 м/с тезликда эсади. Йўлларда яхмалак кузатилади.Тоғли ҳудудларда вақти-вақти билан қор ёғади. Қор кўчиши хавфи бор”, – дея маълум қилган “Ўзгидромет”
Тошкент шаҳрида бугун (20 февраль) кечаси ва эрталаб вақти-вақти билан қор ёғиши қайд этилган. Пойтахтда 21-23 февралда ёғингарчилик кутилмайди ва ҳаво ҳарорати 0–5 даража илиқ бўлади.
Изоҳ (0)