ДХХ Самарқанд вилояти бошқармаси ҳамда вилоят прокуратураси ходимлари ҳамкорлигида ўтказилган тезкор тадбирларда бюджет маблағларини талон-торож қилган давлат хизматчилари аниқланди.
Хусусан, Самарқанд туманида яшовчи, “Самарқанд сув таъминоти” МЧЖ Самарқанд шаҳар филиали раҳбари 36 ёшли Ж.З.нинг кўп миқдордаги пул маблағларини ўзлаштириш йўли билан талон-тарож қилгани аниқланган.
Шунингдек, 1966 йилда Ургут туманида туғилган, “Ҳудудгаз Самарқанд” ГТФ метрология хизмати бошлиғи Р.Ж. ўз мансаб ваколатларидан фойдаланиб, Нарпай туманида жойлашган “Карим қурилиш савдо” ХКнинг норасмий раҳбари О.А. ва унинг жиноий алоқалари томонидан ўғирланган табиий газ ҳисобини яшириш мақсадида, етказиб берилган ва истеъмол қилинган табиий газ ҳисоб-китобларини мунтазам ўзгартириб келган.
Шу билан бирга, у юқори босимли газ тармоқларида юзага келган камомад ва эҳтимолий ўғирлик ҳолатлари мавжудлигини билиб турса-да, масофадан туриб газ тарқатиш станцияларидаги газ ҳисоблагичларига ташқи таъсир кўрсатган.
Юқоридаги ҳолатга кўмаклашган 1982 йилда Нарпай туманида туғилган, “Ҳудудгаз Самарқанд” “Нарпайтумангаз” газ таъминоти бўлими бошлиғи лавозимида ишлаган З.А. ҳам Нарпай туманида жойлашган “Карим қурилиш савдо” ХКнинг норасмий раҳбари О.А. ва унинг жиноий алоқаларининг ноқонуний фаолиятига амалий ёрдам бериб, амалга ошириладиган текширув тадбирлари хусусида олдиндан хабардор қилиб келган. Ҳозирда З.А.га нисбатан ҳам жиноят иши қўзғатилиб, эҳтиёт чораси тариқасида қамоққа олинган.
Бундан ташқари, бир ҳолатда Самарқанд вилояти “Қурилишда танлов савдоларини ташкил этиш консалтинг маркази”нинг директори, 1980 йилда Самарқанд шаҳрида туғилган С.Г. ҳамда марказ бош ҳисобчиси, 1968 йилда Ургут туманида туғилган фуқаро А.Ж. ўзаро жиноий тил бириктирган ҳолда, марказ маблағларини талон-торож қилиб келгани аниқланган.
“Қурилишда танлов савдоларини ташкил этиш консалтинг маркази”нинг 2016— 2023 йиллардаги фаолияти ўрганилганда, марказ мансабдор шахслари ўзаро жиноий тил бириктирган ҳолда, жамиятнинг 1,3 миллиард сўмлик маблағларини ўзлаштириб юборгани аниқланиб, тегишли тартибда ҳужжатлаштирилган.
Ҳозирда юқоридаги ҳолатлар бўйича Жиноят кодексининг тегишли моддалари билан жиноят иши қўзғатилган.
Аввалроқ Самарқандда 631 миллион сўмни ўзлаштириб, қиморда ютқазиб қўйган “Халқ банки” филиали ходими жазолангани тўғрисида хабар берилганди.
Изоҳ (0)