Бухоро, Наманган, Андижон ва Тошкент вилоятларида кредит маблағларини ўзлаштириш ҳолатлари аниқланди, деб хабар беради Бош прокуратура ҳузуридаги департамент.
Маълум қилинишича, департаментнинг Ғиждувон туман бўлими томонидан терговга қадар текширув ўтказилган. Текширув давомида “И.Т.” ва “А.Л.” МЧЖлар раҳбари И.К. чорвачилик фаолиятини ривожлантириш учун ҳудудий тижорат банки филиалидан ажратилган 4,2 миллиард сўм кредит маблағлари эвазига харид қилинган чорва молларини сотиб юбориб, ушбу маблағларни ўзлаштириш йўли билан талон-торож қилгани аниқланган.
Департаментнинг Наманган вилоят бошқармаси томонидан “Ўзмиллийбанк” АЖ Учқўрғон банк хизмати марказининг мурожаатига ўтказилган терговга қадар текширувда “З.7.” МЧЖ раҳбари Ж.С., “Т.Ҳ.” МЧЖ раҳбари С.Т. ва бошқалар умумий овқатланиш шохобчаси ва тайёр таомлар етказиб бериш хизматини ташкил этиш мақсадида ажратилган 800 миллион сўм кредит маблағини ўзлаштириш йўли билан талон-торож қилгани маълум бўлди.
Шу каби, департаментнинг Андижон вилоят бошқармаси томонидан ўтказилган терговга қадар текширувда “П.Т.” МЧЖ раҳбари У.М., “Т.М.” МЧЖ раҳбари И.М. ва бошқалар тижорат банки филиалидан тикувчилик фаолиятини ривожлантириш ва дастгоҳлар сотиб олиш учун ажратилган кредит маблағлари эвазига олинган 800 миллион сўмлик 81 дона ва 291,8 минг доллар қийматидаги 26 дона тикув дастгоҳларини сотиб юбориб, ушбу маблағларни ўзлаштириш йўли билан талон-торож қилгани аниқланган.
Департаментнинг Чирчиқ шаҳар бўлими томонидан ўтказилган терговга қадар текширувда АТ “Халқ банки” Чирчиқ шаҳар филиалидан “И.” МЧЖга ажратилган 735 миллион сўм кредит маблағлари эвазига МЧЖ раҳбари А.Э. гўёки “М.С” ва “Ш.Д” МЧЖ қум, цемент ва шебен қабул қилиб олганлиги тўғрисида сохта ҳужжатларни расмийлаштириб, ушбу маблағларни ўзлаштириш йўли билан талон-торож қилгани фош этилди.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Аввалроқ Бухорода фермер хўжалиги сохта ҳужжатлар орқали 420 минг доллардан ортиқ кредит маблағини ўзлаштириб юборгани аниқлангани тўғрисида хабар берилганди. Шунингдек, Сурхондарё вилоятининг Олтинсой ва Термиз туманларида 11 миллиард сўмдан ортиқ кредит маблағларини ўзлаштирган МЧЖ раҳбарлари аниқланганди. Сурхондарё ва Фарғонада эса оилавий корхона раҳбарлари 1,2 миллиард сўмдан ортиқ имтиёзли кредитларни талон-торож қилганди.
Изоҳ (0)