Ўзбекистон Олий Мажлиси Қонунчилик палатаси спикери Нуриддин Исмоилов бошчилигидаги парламент делегацияси 19—20 февраль кунлари Россияда бўлади. Бу ҳақда парламент қуйи палатаси матбуот хизмати хабар берди.
Ташриф дастурига мувофиқ, Ўзбекистон парламенти делегациясининг Россия давлат думаси раиси Вячеслав Володин ҳамда Россия Федерал Мажлиси федерация кенгаши раиси Валентина Матвиенко билан учрашувлар режалаштирилган.
Бўлажак учрашувларда парламентлараро алоқаларни янада кенгайтириш ва мустаҳкамлаш, бу йўналишдаги ҳамкорликни кучайтириш масалаларига алоҳида эътибор қаратилади.
Шунингдек, Ўзбекистон Олий Мажлиси Қонунчилик палатасининг Россия Федерал Мажлисининг давлат думаси билан ҳамкорлик бўйича парламентлараро комиссиясининг биринчи мажлиси бўлиб ўтиши назарда тутилган.
Мазкур ташриф Россия парламенти делегация аъзоларининг Олий Мажлис Қонунчилик палатасида (2022 йил, ноябрь) бўлиб ўтган учрашуви давомида режалаштириб олинган эди.
Эслатиб ўтамиз, 2023 йил сентябрда Ўзбекистон ва Россия ҳукумат раҳбарлари даражасидаги Қўшма комиссиянинг навбатдаги мажлиси бўлиб ўтганди. Унда икки мамлакат ўртасидаги савдо-иқтисодий, сармоявий ва маданий-гуманитар ҳамкорликнинг кенг кўламли масалаларини кўриб чиқилган.
Изоҳ (0)