Дания мудофаа вазири Троэлс Лунд Поулсен яқин 3-5 йил ичида Россия ва НАТО ўртасида ҳарбий можаро бошланиши мумкинлигини айтди. Унинг қўшимча қилишича, Россиянинг ҳарбий техника ишлаб чиқариш салоҳияти сезиларли даражада ошган.
“Уч-беш йил ичида Россия НАТОнинг бешинчи моддасини ва альянсга аъзо давлатларнинг бирдамлигини текшириб кўриши мумкин... Бу ҳозир олдинга чиқаётган масала”, — деди вазир.
НАТО шартномасининг бешинчи моддасига кўра, альянсга аъзо давлатлар қуролли ҳужумга учраган ҳар қандай аъзо давлатга ёрдамга келиши керак.
Поулсеннинг сўзларига кўра, Россияда “буни қилиш учун истак бор”. Унинг аниқлик киритишича, Данияга тўғридан тўғри таҳдид йўқ, бироқ мамлакат гибрид ҳужумларга дуч келиши мумкин.
Аввалроқ НАТО ҳарбий қўмитаси раҳбари Роб Бауер альянс яқин йигирма йил ичида Россия билан кенг кўламли урушга тайёргарлик кўраётганини айтганди. Германия мудофаа вазири Борис Писториус можаро 3-5 йил ичида бошланишини тахмин қилди. Швеция, Норвегия, Буюк Британия ва бошқа мамлакатлар расмийлари ҳам уруш бошланиши мумкинлигини айтиб ўтишган.
Россия ташқи ишлар вазири Сергей Лавров бундай баёнотларни абсурд деб атади. Россия Федерацияси Ташқи разведка хизмати директори Сергей Наришкиннинг айтишича, бу “Ғарбнинг ҳозирги гибрид агрессиясини” оқлаш учун олиб борилаётган ахборот урушининг бир қисмидир.
Изоҳ (0)