Тошкент вилоятининг Ангрен шаҳридаги оилавий нодавлат мактабгача таълим ташкилотига мўлжалланаётган уйларнинг бирида 1 ёш 8 ойлик бола куйиб қолди. Бу ҳақда шаҳар ҳокимлиги матбуот хизмати хабар қилди.
Ангрен шаҳар Мактабгача ва мактаб таълими бўлими бошлиғи Сарвар Нуриддиновнинг маълум қилишича, ҳолат 10 февраль шанба куни соат 14:00 ларда содир бўлган. Боланинг онаси яқин таниши бўлган, хонадон аъзоси, М.Д.га ишга чиқишини маълум қилиб, ўзининг розилиги билан 1 ёш 8 ойлик бўлган фарзандини қараб туришини илтимос қилган. Улар ўзаро келишгандан сўнг болани М.Д.нинг уйига олиб келиб топширган. Аёл болага қараган. Унинг айтишича, куйиш эҳтиётсизлик оқибатида рўй берган ва бу тўғрисида боланинг оиласига хабар берилган.
Шаҳар тиббиёт бирлашмаси бош шифокорининг билдиришича, умумий тананинг 8 фоизи куйган. Олиб борилаётган муолажалар натижасида боланинг умумий аҳволи яхшиланган. Ҳозирда бола шифокорлар назорати остида даволанишда давом этмоқда.
Шаҳар ҳокими бемор бола ва унинг онасидан хабар олиб, боланинг соғлиғи доимий назоратда бўлиши, керакли муолажалари сифатли амалга ошириш ва мавжуд имкониятлардан фойдаланиш бўйича тиббиёт бирлашмаси бош шифокорига топшириқлар берган.
Ангрен шаҳар ИИБ маъмуриятининг берган маълумотига кўра, боланинг куйиш ҳолати юзасидан ҳозирда шаҳар ИИБ ҳузуридаги тергов бўлими томонидан терговга қадар текширув ҳаракатлари олиб борилмоқда.
Изоҳ (0)