Хоразмда 12,5 минг нафар қоидабузар ҳайдовчидан 3,8 млрд сўмдан ортиқ қарздорлик ундирилди

Хоразмда 12,5 минг нафар қоидабузар ҳайдовчидан 3,8 млрд сўмдан ортиқ қарздорлик ундирилди. Бу ҳақда Бош прокуратура матбуот хизмати хабар берди. 

Маълум қилинишича, Бош прокуратура ҳамда МИБнинг Хоразм вилояти бошқармаси томонидан ҳамкорликда ўтказилган қўшма рейд тадбирлари давомида маъмурий жарималарни белгиланган муддатда тўламаган фуқаролар замонавий технологиялар ёрдамида аниқланган. 

Шундан келиб чиқиб, 12 574 нафар қоидабузар ҳайдовчилардан 3,8 млрд сўмдан ортиқ қарздорлик ундирилган. Жаримани тўлашдан бош тортган қарздорларга тегишли бўлган 137 та автотранспорт воситалари жарима майдончасига жойлаштирилган.

Шундан 46 таси бошқарма иш юритувидаги ижро ҳужжатлари бўйича қидирувда бўлган транспорт воситалари экани аниқланган. Жумладан, ижро ҳужжати бўйича қарздор “DUMAUZCHINA” хусусий корхонасининг белгиланган муддатда тўланмаган 165 млн сўм миқдоридаги солиқ қарздорлиги сабабли корхонага тегишли бўлган автотранспорт воситаси жарима майдонига жойлаштирилиб, қарздорликни ундириш чоралари кўрилмоқда.