Хонобод—Андижон—Избоскан—Асака йўналишида поезд қатнови йўлга қўйилади

Андижон вилоятида бўлиб ўтаётган давлат раҳбари раислигидаги йиғилишда вилоятда транспорт хизматларини яхшилаш мақсадида мутасаддиларга қатор топшириқлар берилди. 

Жумладан:

• Хонобод—Андижон—Избоскан—Асака темирйўл айланмасида поезд қатновини йўлга қўйиш;
• Андижон—Қўқон, Андижон—Тошкент, Андижон—Термиз ва Андижон—Қўнғирот йўналишларида поезд қатновини 2 карра ошириш;
• Андижон—Шаҳрихон, Андижон—Асака ва Андижон—Дўстлик йўналишида автобус қатновини 2 баробар кўпайтириш топширилди.

Вилоятда 35 та трансформатор катта юклама билан ишлаётгани, Бўстон ва Улуғнор туманларида электр таъминотидаги узилишлар кўпайгани кўрсатиб ўтилди. Шу боис Шаҳрихондаги подстанциядан 23 километр электр тармоғини тортиб, 2 та янги подстанция қуриш топширилди.

Шунингдек, Хитой компаниялари билан ҳамкорликда Асакада 150 мегаватт, келаси йили 100 мегаватт электр сақлаш тизимини ишга тушириш режалаштирилган, Андижон туманида жами қуввати 400 мегаватт бўлган қуёш станциялари қурилиши бошланади. Икки йилда 3 та кичик ва микро ГЭС қурилишини якунлаш, ҳиндистонлик ҳамкорлар билан “Шаҳрихонсой” каналида кинетик турбинали 2 та микро ГЭСни ишга тушириш муҳимлиги таъкидланди.

Андижонда 4,5 минг километр янги йўл қуриш бўйича уч йиллик дастур қабул қилинган. Мавжуд 700 километр йўл бўйини 10 йилгача аҳолига бўлиб бериб, дарахт экиш зарурлиги айтилди.

Андижон аэропортини хусусий шериклик асосида модернизация қилиш ва бошқарувга бериш ишлари олиб борилмоқда.