“Мен руҳий таназзулда эдим”. Гризманн 2019 йилда нега “Атлетико”ни тарк этгани ҳақида гапирди

“Атлетико Мадрид” ҳужумчиси Антуан Гризманн 2019 йилда клубни тарк этган пайтдаги хотиралари билан ўртоқлашди. Ўшанда франциялик футболчи “Барселона”га 120 миллион евро эвазига ўтган эди.

“Мен ‘Атлетико Мадрид’ни тарк этишга қарор қилган пайтим руҳий ҳолатим жуда ёмон эди. Ўзим ёмон ўйнаганимда ҳам бошқаларни айбдор ҳисоблаб, турли баҳоналар ўйлаб топардим.

Янги клубга ўтгач, мен Мадридда, ‘Атлетико’да жуда бахтли бўлганимни англадим ва ҳар доим қайтишга ҳаракат қилардим. Симеонега қайтишни хоҳлаётганимни айтдим ва синглимга ҳам мени қайтариш учун бор имкониятини ишга солиши кераклигини тайинладим, чунки мен янги клубга ўтиб ўзимга зарар келтираётганимни билардим”, — дейди Гризманн Atletico Universe’га берган интервьюсида.

Эслатиб ўтамиз, Антуан 2019 йилда “Барселона”га ўтган, 2021 йилда эса “Атлетико Мадрид”га қайтган.

У “матрасчилар” сафида 376 та ўйинда қатнашиб, 175 та гол уриб, 83 та голли узатмани амалга оширган.